Kusog nga El Niño Posibleng Makaapekto sa Panglawas sa Tibuok Kalibotan — UN

Pas-pas nga nagkusog ang El Niño ug gilauman nga makaapekto sa panglawas sa tibuok kalibotan, diin posibleng labing grabe ang epekto sa mga nasod nga huyang na daan ang sistema sa panglawas ug nag-atubang og mga krisis sa katawhan, pasidaan sa mga ahensya sa UN niadtong Martes.

“We’ve just lived through the two hottest months on record. Sea surface temperatures are at record levels,” matod ni Armel Castellan, extreme heat adviser sa hiniusang WHO-WMO climate and health program, ngadto sa mga tigbalita sa Geneva.

Matod ni Castellan, gilauman nga moabot sa kinatas-ang kakusog ang El Niño sa kataposang bahin sa 2026, apan iyang gipasiugda nga magpadayon pa ang mga epekto niini human niana.

Sa pag-abot sa kinatas-ang kakusog sa El Niño, kadaghanan sa Southern Hemisphere, lakip ang southern Africa, South America ug Australia, mosulod sa labing init nga panahon niini sa sayong bahin sa 2027, nga posibleng makadugang sa risgo sa hulaw, mga sunog sa kalasangan, aso ug polusyon sa hangin, matod niya.

Gisultihan ni Teresa Zakaria, WHO’s unit head for risk reduction, humanitarian operations and climate change, ang mga tigbalita nga ang El Niño “a significant public health threat, not just a climate phenomenon.”

Matod niya, giklasipikar nga “very high” ang risgo sa malnutrisyon ug cholera sa mga lugar nga apektado sa hulaw ug baha.

Kapin sa 150 milyon ka tawo sa tibuok kalibotan ang nag-atubang na og grabeng kakulang sa pagkaon, ug gilauman nga mosaka pa kini samtang ang mga kalamidad nga may kalabotan sa klima makabalda sa produksyon sa pagkaon ug panginabuhian, matod niya.

Mahimong makadugang usab ang mas init nga temperatura ug kausaban sa pag-ulan sa pagkaylap sa mga sakit nga gidala sa lamok, lakip ang malaria, dengue, chikungunya, yellow fever ug Zika, ug posibleng mokaylap kini ngadto sa mga lugar diin dili kini kasagarang makita.

“We have a window of opportunity to act now before these risks become crises,” matod ni Zakaria. -Ato ni Bai