Kusog kaayong El Niño, magdala og mas diyutay nga ulan sa PH padulong sa kataposan sa tuig

Makasinati ang kadaghanang bahin sa nasud og mas ubos kaayo sa normal nga pag-ulan tungod sa gipaabot nga kusog kaayong El Niño padulong sa kataposan sa tuig, matod niadtong Lunes sa pangulo sa Philippine Atmospheric, Geophysical and Astronomical Services Administration (PAGASA).

“This means 60 percent or more reduction of average rainfall in a month,” matod ni PAGASA Administrator Nathaniel Servando sa Philippine News Agency sa usa ka interview.

Adunay moderate to strong El Niño karon sa Tropical Pacific.

Gipaabot nga magpadayon ang El Niño hangtod sa unang katunga sa 2027 ug mahimong mokusog pag-ayo sa dili pa matapos ang 2026.

Karong Setyembre, gipaabot ang below-normal nga pag-ulan sa kadaghanang bahin sa Northern Luzon, samtang duol sa normal ang pag-ulan sa ubang bahin sa nasud.

Pagka-Oktubre, gipaabot ang below-normal nga pag-ulan sa Luzon, Visayas, ug Caraga, samtang duol sa normal ang pag-ulan sa ubang bahin sa Mindanao.

Sa Nobyembre, gipaabot ang way below normal hangtod below-normal nga pag-ulan sa tibuok nasud. Posible usab ang duol sa normal nga pag-ulan sa pipila ka bahin sa Mindanao.

Sa Disyembre, gitagna sa PAGASA ang above-normal nga pag-ulan sa kadaghanang bahin sa Luzon ug Western Visayas, samtang gipaabot ang below-normal nga pag-ulan sa kadaghanang bahin sa Visayas ug Mindanao.

Gipasabot ni Servando nga ang “above normal rainfall” sa Luzon sa Disyembre mahimong dili kaayo dako ang epekto tungod kay kasagarang uga niining panahona sa Western Luzon.

“Normal rainfall in December is relatively low, and this might be due to the shearline or the northeast monsoon,” matod niya.

Sa Enero 2027, gipaabot ang way below normal hangtod below-normal nga pag-ulan sa tibuok nasud, gawas sa pipila ka bahin sa Mindanao diin posibleng duol sa normal ang pag-ulan.

Gipaabot usab nga makasinati ang tibuok nasud og way below normal hangtod below-normal nga pag-ulan sa Pebrero.

“The peak of El Niño will be from October to December, but impacts may vary depending on locations and the severity,” dugang ni Servando. -Ato ni Bai