Kenya Mikumpirma sa Unang Kaso sa Ebola nga Nalambigit sa Congo

Gikumpirma sa Kenya niadtong Martes ang unang kaso niini sa Ebola human namatay sa Nairobi ang usa ka Kenyan nga gikan sa Democratic Republic of Congo.

Ang Kenya maoy ikatulong nasod nga nakarekord og kaso nga nalambigit sa epidemya sa Ebola sa silangang Congo, nga maoy ikaduhang pinakadakong outbreak nga natala. Nakarekord ang Uganda og 20 ka kaso ug duha ka kamatayon sa sayong bahin sa tuig apan gideklarar nga Ebola-free niadtong Agosto.

Nagmasakiton na ang Kenyan nga pasyente sulod sa mga usa ka bulan sa wala pa siya mibiyahe pinaagi sa dalan gikan sa Congo paingon sa Kampala, kapital sa Uganda, ug dayon milupad paingon sa Nairobi niadtong Sabado, matod ni Health Minister Aden Duale sa usa ka press conference.

Human miabot sa international airport sa Nairobi, miagi siya sa pagsusi sa panglawas ug sa ulahi gidala sa usa ka paryente ngadto sa Nairobi Hospital. Gi-admit siya tungod sa hilanat, pagpangurog sa katugnaw, ug pagdugo ilawom sa panit ug gilain dayon gikan sa ubang pasyente, matod ni Duale.

Namatay siya sa ulahing bahin sa Lunes.

Matod ni Health Ministry Director General Patrick Amoth, posibleng nakalusot ang pasyente sa pagsusi sa airport tungod kay natabonan sa tambal ang iyang mga sintomas.

PASYENTE ILUBONG KARONG MARTES

Matod ni Duale, andam pag-ayo ang Kenya sa pagtubag sa mga kaso sa Ebola.

“We have continued to maintain, as a country, a high level of alert for Ebola since the outbreak began in May,” matod niya.

Gitakdang ilubong ang pasyente sa ulahing bahin sa Martes subay sa mga pamaagi nga gitakda aron mapugngan ang dugang nga pagkaylap sa virus, matod ni Duale.

Nailhan na sa mga awtoridad sa panglawas ang 28 ka tawo nga nakahalubilo sa pasyente sa Kenya, lakip ang mga paryente ug mga health worker. Gipangita usab nila ang laing 23 ka pasahero ug upat ka tripulante nga kauban niya sa Jambojet flight, matod niya.

Mokatap ang Ebola pinaagi sa direktang pagkontak sa mga likido sa lawas sa natakdan nga tawo, buhi man o patay. Mahimong hinungdan ang sakit og hilanat, pagsuka, kalibanga ug, sa grabeng mga kaso, pagdugo sulod ug gawas sa lawas.

Gideklarar ang outbreak sa Congo sa tunga-tunga sa Mayo apan posibleng nagsugod kini pipila ka bulan sa wala pa kana. Kapin 8,000 ka tawo na ang natakdan ug kapin 4,000 ang namatay bisan pa sa mga paningkamot nga mapugngan ang pagkaylap niini.

Ang outbreak gipahinabo sa talagsaong Bundibugyo strain sa Ebola, nga wala pay napamatud-ang bakuna o tambal.

-Ato ni Bai