top of page
Bai (150 x 150 px) (100 x 100 px).png

Kapulisan sa Metro Manila nagpabiling naka-full alert human sa Undas

Gipadayon sa National Capital Region Police Office (NCRPO) ang full alert status sa tibuok Metro Manila samtang nagpadayon ang pagpauli sa mga pamilya human sa pagsaulog sa All Saints' Day ug All Souls' Day, o Undas, sumala sa taho sa Philippine News Agency (PNA).

RA Sibag; Paraluman News/From reports by Philippine News Agency; Gihubad ni Alex Destor / Ato ni Bai

November 2, 2026 at 10:32:38 AM

Security personnel inspect visitors’ bags at Manila North Cemetery.

Security personnel inspect the bags of visitors entering the Manila North Cemetery in Sta. Cruz, Manila, on Sunday (Nov. 1, 2026), as part of security measures for the observance of All Saints’ Day.

PNA / Avito Dalan

Gipadayon sa National Capital Region Police Office (NCRPO) ang full alert status sa tibuok Metro Manila samtang nagpadayon ang pagpauli sa mga pamilya human sa pagsaulog sa All Saints' Day ug All Souls' Day, o Undas, sumala sa taho sa Philippine News Agency (PNA).


Hangtod sa udto sa Lunes, gitaho sa NCRPO nga malinawon ug hapsay sa kinatibuk-an ang pagsaulog sa All Saints' Day, diin liboan ka pamilya ang mibisita sa mga sementeryo, memorial park, ug columbaria aron paghatag og pagtahod sa ilang mga minahal sa kinabuhi nga nangamatay na.


Sa usa ka pahayag, matod ni NCRPO officer-in-charge Brig. Gen. Christopher Abrahano nga nagpabiling nakadeploy ang mga pulis aron motubag sa mga emerhensiya, magmintinar sa kalinaw ug kahapsay, ug motabang sa publiko samtang nagpadayon ang pagbiyahe sa mga tawo.


"As families continue their journey home after Undas, the NCRPO assures the public that its personnel will remain ready to respond to emergencies, maintain peace and order, and provide assistance wherever needed," matod ni Abrahano.


Nagpabiling daghan ang mga pulis sa mga lugar nga adunay grabeng trapiko ug daghang pasaherong nanguli. Giawhag usab sa NCRPO ang publiko nga ireport dayon sa mga otoridad ang mga kadudahang kalihokan o emerhensiya.


Gipasidan-an usab sa ahensiya ang publiko batok sa mga mangingilad nga mahimong mopahimulos sa maong okasyon, lakip ang mga tawo nga magpakaaron-ingnong mga lider sa relihiyon ug motanyag og pag-ampo o panalangin baylo sa kuwarta.


Samtang niini, nakigtambayayong ang Philippine Army sa mga ahensiya sa gobyerno ug uban pang mga grupo sa pagpasidungog sa mga bayani sa nasod nga nangamatay na pinaagi sa pagpandong og mga bulak, pagdagkot og kandila, ug pagbutang og mga bandera sa Libingan ng mga Bayani sa Fort Bonifacio, Taguig City, niadtong Oktubre 31.


Matod sa Army, ang dungan nga pagdagkot og mga kandila ug pagbutang og gagmayng bandera gihimo aron paghatag og pagtahod sa mga sundalo, nasodnong bayani, artista, siyentista, ug kanhing mga presidente nga gilubong sa nasodnong sementeryo.


Hangtod niadtong Oktubre 29, mikabat na sa 54,568 ang kinatibuk-ang gidaghanon sa mga patay nga gilubong sa Libingan ng mga Bayani. -RA Sibag; Paraluman News/From reports by Philippine News Agency; Gihubad ni Alex Destor / Ato ni Bai

bottom of page