Kapin 1,700 ka Estudyante ug Magtutudlo, Nangasakit Tungod sa Libreng Pagkaon sa Indonesia

Nakaangkon og food poisoning ang laing 777 ka estudyante ug magtutudlo sa Central Java, Indonesia, human mokaon sa libreng pagkaon nga gihatag sa gobyerno, matod sa usa ka principal sa eskwelahan niadtong Huwebes, nga nagdala sa kinatibuk-ang gidaghanon sa nangasakit tungod sa programa ngadto sa kapin 1,700 sulod lamang sa usa ka semana.

Sa managlahing insidente sa tulo pa ka lugar karong semanaha, 950 ka Indonesian ang nangasakit tungod sa food poisoning nga nalambigit sa programa, matod sa usa ka miyembro sa parliamentary commission nga nagdumala sa panglawas.

Gilunsad ni President Prabowo Subianto sa miaging tuig ang multibillion-dollar nga programa sa libreng pagkaon aron mapauswag ang nutrisyon sa napulo ka milyon nga mga bata, apan ang mahal nga programa giatubang sa mga alegasyon sa korapsyon, mga kausaban sa liderato, ug sunod-sunod nga mga insidente sa dinaghang food poisoning.

Sa usa ka senior high school sa Lasem, Central Java, 752 ka estudyante ug 25 ka magtutudlo ang nakasinati og kalibanga ug pagsuka human mokaon sa libreng pagkaon niadtong Miyerkules, matod sa principal sa eskwelahan nga si Juhartutik.

Gihatagan og sinugbang manok ang mga estudyante sa Lasem. Sa wala pa kini ipanghatag, nakit-an sa usa ka food taster nga ang pipila niini “slimy”, matod ni Juhartutik.

“The slimy ones had already been set aside… The kitchen operator said the food was cooked at 3 a.m. and it was eaten at noon,” matod niya, ug midugang nga kadaghanan sa mga biktima gipauli.

Matod ni Joko Paryanto, usa ka lokal nga doktor nga mitambal sa mga biktima, 15 ka estudyante ug magtutudlo ang naospital.

Niadtong Martes, 664 ka estudyante ang nangasakit sa Sidoarjo, East Java, matod ni Herawati Yuwantina, usa ka lokal nga opisyal.

Sa duha pa ka kaso niadtong Miyerkules, 49 ka tawo sa siyudad sa Nganjuk sa East Java ug 237 sa rehiyon sa Agam sa West Sumatra ang nakaangkon og food poisoning, matod ni Charles Honoris, usa ka magbabalaod ug miyembro sa bugtong political party nga wala sa governing coalition, nga mikutlo sa datos sa lokal nga health department.

Gisulat ni Charles sa Instagram nga dili kini mga nahilit nga insidente.

“This is a failure of the system,” matod niya.

Ang National Nutrition Agency, nga nagdumala sa $12.94 billion nga programa, wala dayon motubag sa hangyo alang sa komento bahin sa mga kaso sa food poisoning. Gisuspenso niini niadtong Miyerkules ang kusina nga nalambigit sa kaso sa Sidoarjo.

Hangtod niadtong Setyembre 1, 50,000 ka indibidwal ang naapektuhan sa mga kaso sa food poisoning, matod ni Charles, nga mikutlo sa datos sa health department.

Ang dili hustong pagtipig sa pagkaon ug ulahing paghatod sa nalutong mga pagkaon kasagarang hinungdan sa food poisoning.

Niadtong Hulyo, gipakita sa survey sa pollster nga Saiful Mujani Research and Consulting nga usa lamang sa matag tulo ka tawo ang kontento sa programa, diin ang mga kaso sa food poisoning maoy usa sa mga dagkong rason. -Ato ni Bai