Kanhi Malaysian PM Mahathir 101 Giospital Duha ka Adlaw Human sa Kamatayon sa Asawa

Gi-admit sa ospital si kanhi Malaysian Prime Minister Mahathir Mohamad, matod sa iyang opisina niadtong Miyerkules, duha ka adlaw human namatay ang iyang asawa nga si Siti Hasmah Mohamad Ali.

Gi-admit si Mahathir, 101, sa National Heart Institute sa Kuala Lumpur niadtong Martes sa gabii aron bantayan ang iyang kahimtang, apan wala pa maklaro ang hinungdan sa iyang pagkaospital samtang gihulat ang opisyal nga diagnosis, matod sa iyang aide nga si Sufi Yusoff.

Nanguna si Mahathir sa nasod sa Southeast Asia sulod sa kapin duha ka dekada sa duha ka managlahing higayon. Aduna siyay kasaysayan sa problema sa kasingkasing ug nakaagi na og bypass surgeries. Makadaghang higayon na usab siyang naospital sa bag-ohay nga mga tuig, ug labing bag-o niadtong Enero tungod sa pagkabali sa iyang bat-ang human siya natumba.

Namatay niadtong Lunes sa edad nga 100 ang iyang asawa nga si Siti Hasmah, usa ka doktor ug tigpasiugda sa panglawas sa publiko nga iyang nakauban sa kaminyoon sulod sa 70 ka tuig.

Makita nga grabeng naapektuhan si Mahathir sa iyang kamatayon ug mihilak samtang nagsulti sa kanhing hari sa nasod nga “didn’t expect her to die today,” sumala sa video nga nakuha atol sa iyang lubong ug gipatik sa iyang mga social media account. -Ato ni Bai