%20(100%20x%20100%20px).png)
Kamatayon sa sunog sa barko sa Palawan misaka sa 77
Misaka sa 77 ang gidaghanon sa mga namatay sa sunog nga miabo sa MV June Aster sa kadagatan sa Coron, Palawan, human namatay sa ospital ang usa ka crew member nga unang naluwas sa insidente, matod sa Philippine Coast Guard (PCG).
Ato ni Bai
September 17, 2026 at 8:40:16 AM
.avif)
Nagbarog ang mga miyembro sa Philippine Coast Guard nga nagsul-ob og personal protective equipment sa Port of Borac human magdala og mga body bag nga adunay narekober nga patayng lawas sa mga biktima sa sunog sa MV June Aster ferry sa kadagatan duol sa Palawan, sa Coron, Philippines, Setyembre 13, 2026.
Eloisa Lopez / Reuters
Misaka sa 77 ang gidaghanon sa mga namatay sa sunog nga miabo sa MV June Aster sa kadagatan sa Coron, Palawan, human namatay sa ospital ang usa ka crew member nga unang naluwas sa insidente, matod sa Philippine Coast Guard (PCG).
Sa usa ka pahayag niadtong Miyerkules, miingon si PCG spokesperson Commodore Noemie Cayabyab nga gideklarang patay ang crew member sa Culion Sanitarium and General Hospital alas 11:34 sa buntag niadtong Martes.
Mikunhod ngadto sa 43 ang gidaghanon sa mga survivor, samtang 12 ka tawo ang nagpabiling missing gikan sa 132 nga nakalista sa ticket manifest sa barko.
Miingon ang PCG nga padayon kini nga nakigkoordinar sa mga hingtungdang awtoridad alang sa nagpadayong recovery operations ug imbestigasyon sa insidente.
Misutoy ang sunog sa barko niadtong Setyembre 9 samtang nagbiyahe kini gikan sa Batangas paingon sa Coron.
Una nang miingon ang PCG nga ang kapitan sa barko nga si Roel Sarmiento, nga missing sukad nasunog ang barko, boluntaryong mitungha ug miatubang sa mga awtoridad niadtong Lunes aron tubagon ang mga pangutana bahin sa iyang nahimutangan.
Gimandoan usab sa ahensya ang operator sa barko nga Atienza Interisland Ferries Inc. nga mokuha og salvor aron motabang sa siphoning operations ug pagsusi sa structural integrity sa barko.
-Ato ni Bai