Israeli airstrike sa Gaza, 2 patay ug 13 ang nasamdan

CAIRO - Napatay sa Israeli airstrike niadtong Domingo ang labing menos duha ka Palestinian nga sakay sa usa ka sakyanan ug nasamdan ang 13 ka uban pa sa Gaza Strip, matod sa medical staff.

Grabeng naguba ang sakyanan human sa airstrike sa Tel Al-Hawa neighbourhood sa western Gaza City, base sa footage nga mikaylap sa social media. Gisultihan sa local medical staff ang Reuters nga nanawagan sila sa mga tawo nga mohatag og impormasyon nga makatabang sa pag-ila sa duha ka namatay, kansang mga lawas nagkabahin-bahin tungod sa pagbuto.

Matod sa Israeli military, duha ka Hamas militants ang target sa airstrike, apan wala kini mohatag og dugang impormasyon.

Gipahunong sa U.S.-backed ceasefire niadtong Oktubre 2025 ang dinagkong panag-away sa Gaza, apan wala niini hingpit nga nahunong ang Israeli strikes ug gamay ra ang kalamboan sa mga lakang padulong sa permanenteng kalinaw.

Giakusahan sa Hamas ang Israel nga naglapas sa ceasefire ug nagpugong sa mga paningkamot nga ipatuman ang mas halapad nga plano ni U.S. President Donald Trump aron tapuson ang Gaza conflict. Apil sa plano ang pag-withdraw sa Israel gikan sa Gaza Strip ug ang pagdisarma sa Hamas.

Matod sa Israel, ang Hamas maoy naglapas sa kasabotan.

Kapin sa 1,300 ka Palestinian, kadaghanan mga sibilyan, ang napatay sa Gaza sukad nagsugod ang ceasefire, sumala sa health officials sa teritoryo, samtang matod sa Israeli military, upat ka Israeli soldiers ang napatay.

Kasagaran dili magpagawas ang Hamas og impormasyon bahin sa mga namatay nga miyembro sa ilang mga fighter.

-Ato ni Bai