Indonesia Midakop sa Kapitan sa Barko nga Nalunod sa Java Sea ug Mipatay og 78

Gidakop sa kapolisan sa Indonesia ang kapitan sa barko nga nalunod sa Java Sea niaging bulan, nga mikitil sa kinabuhi sa labing menos 78 ka tawo ug misangpot sa dugay ug lisod nga pagpangita sa mga pasahero nga nagpadayon gihapon.

Nagdala og 243 ka tawo ang Virgo Transport 8 ferry sa dihang nalunod kini tungod sa daotang panahon sa Java Sea niadtong Setyembre 13 samtang nagbiyahe gikan sa Surabaya sa East Java paingon sa Banjarmasin sa South Kalimantan. Matod sa mga awtoridad, 108 ka tawo ang naluwas.

Naglibot-libot ang mga mananalom sa barko ug nakigbisog sa kusog nga sulog sa dagat ug dili lig-on nga estruktura niini aron pangitaon ang mga nawala nga tawo diha sa deck.

Gikutlo sa state news agency Antara niadtong Miyerkules si senior national police official Kukuh Prabowo nga miingon nga gidakop na ang kapitan sa barko ug giila isip suspek sa krimen.

Matod ni Kukuh, gidudahang nakalapas ang kapitan sa shipping law sa Indonesia tungod sa tinuyong pagpalawig sa usa ka barko nga dili angay mobiyahe sa dagat, usa ka sala nga mahimong silotan og hangtod 10 ka tuig nga pagkabilanggo kung mosangpot kini sa kamatayon ug kadaot sa kabtangan.

Wala siya mohatag og bisan unsang detalye bahin sa giingong mga krimen.

Misaka sa 78 ka tawo ang kasamtangang ihap sa mga namatay sa insidente, samtang 57 ka tawo ang nagpabiling nawala, matod sa search and rescue agency sa Indonesia niadtong Miyerkules sa gabii. -Ato ni Bai