Hurricane Simon nagdala og baha ug pagpangbakwet sa Pacific coast sa Mexico

Mihinay nga milihok paamihanan-kasadpan ang Hurricane Simon duol sa Pacific coast sa Mexico sayong Lunes, nga nagdala og kusog nga hangin, ulan, ug pagbaha sa kasadpang bahin sa nasod. Tungod niini, gipaalerto ang mga komunidad duol sa mga suba alang sa posibleng pagpangbakwet.

Sumala sa US National Hurricane Center, nahimutang ang Simon mga 80 kilometros sa kasadpan-habagatan-kasadpan sa Cabo Corrientes sa estado sa Jalisco alas 5 sa buntag sa lokal nga oras (1200 GMT). May kusog kini sa hangin nga 185 kilometros matag oras, nga giklasipikar isip Category 3 nga bagyo.

Mihinay ang paglihok sa bagyo paamihanan-kasadpan sa gikusgon nga 4 kilometros matag oras. Gilauman nga magpadayon kini sa maong direksyon sa dili pa moliko paamihanan-sidlakan ug motabok sa kayutaan sa west-central Mexico sa tunga-tunga sa semana.

Gipasidan-an sa mga awtoridad nga posibleng magdala ang Simon og makamatay nga pagbaha ug pagdahili sa yuta sa pipila ka bahin sa Pacific coast ug kasikbit nga kabukiran.

Gibanabana nga magdala pa ang bagyo og dugang nga 5 hangtod 10 sentimetros nga ulan sa mga baybayon sa southwest ug west-central Mexico, samtang posibleng moabot sa 15 hangtod 20 sentimetros ang ulan sa pipila ka lugar sa Jalisco ug Sinaloa. Sumala sa National Hurricane Center, posibleng moabot sa 76 sentimetros ang kinatibuk-ang ulan nga dala sa bagyo sa pipila ka bahin sa Michoacan, Colima, ug Jalisco.

Sa lungsod sa Cihuatlan sa Jalisco, duol sa utlanan sa Colima, nagpatrolya ang Mexican Army, mga opisyal sa Civil Protection, ug Red Cross tungod sa pagsaka sa tubig sa Marabasco River. Gibahaan ang mga dalan ug ubos nga mga lugar sa lungsod sa miaging gabii.

Sa pantalan nga siyudad sa Manzanillo sa estado sa Colima, naglusong sa baha ang mga residente sulod sa ilang mga balay ug sa kadalanan samtang mitabang ang mga personnel sa navy sa pagpahubas sa tubig.

"Everything got flooded," matod sa residenteng si Maria Elena Vazquez samtang naa sa sulod sa iyang balay, nga gipilo ang iyang pantalon tungod kay miabot na sa iyang buolbuol ang tubig.

Gipasidan-an sa National Hurricane Center nga posibleng adunay delikadong pagsaka sa tubig sa dagat duol ug sa sidlakang bahin sa lugar nga duolan sa Simon, uban sa dagkong balod nga makadaot. Gilauman usab nga magdala ang bagyo og delikadong mga balod ug kusog nga sulog nga makabira sa mga tawo palayo sa baybayon sa southwest ug west-central Mexico sa mosunod nga mga adlaw.

Mihuyang na ang Simon gikan sa Category 4 ngadto sa Category 3, apan matod sa mga tigbanabana sa panahon, posibleng magpabilin kini nga hurricane hangtod sa tunga-tunga sa semana sa dili pa paspas nga mohuyang human motabok sa kabukiran sa Mexico. -Ato ni Bai