Hurricane Polo Miigo sa Baja California Sur sa Mexico Padulong sa Mainland

Miigo sa habagatang bahin sa Baja California peninsula sa Mexico ang Hurricane Polo sayong kabuntagon niadtong Martes, nga adunay kusog sa hangin nga moabot sa 200 km/h (125 mph).

Gilauman sa mga awtoridad nga magpadayon sulod sa pipila ka oras ang makamatay nga kahimtang tungod sa bagyo sa tibuok Baja California Sur, samtang gilauman usab nga mograbe ang panahon sa habagatang bahin sa mainland state sa Sonora.

Miigo sa yuta ang Polo isip category 2 hurricane sa habagatan sa Las Barrancas, sa tungatunga sa kasadpang baybayon sa estado, usa ka lugar nga mas gamay og populasyon kumpara sa Los Cabos resort corridor sa habagatang tumoy sa peninsula.

Matod sa Mexico’s National Weather Service, nagdala kini og padayong kusog sa hangin nga 150 hangtod 170 km/h, uban sa paghuros nga 180 hangtod 200 km/h ug mga balod nga 7 hangtod 9 metros ang kataas.

Gilauman nga magdala ang bagyo og 6 hangtod 12 inches (15 hangtod 30 cm) nga ulan sa tibuok Baja California Sur, uban sa peligro sa makamatay nga pagbaha ug pagdahili sa yuta, sumala sa US National Hurricane Center.

Gilauman nga magpabiling hurricane ang Polo sa ikaduha niini nga pag-igo sa yuta sa mainland Mexico human motabok sa Gulf of California.

Giawhag sa mga awtoridad sa Mexico ug sa NHC ang mga residente nga magpabiling luwas sulod sa ilang mga balay hangtod sa buntag, o mopasilong sa temporaryong mga evacuation center nga giablihan sa mga lugar nga taas og peligro.

Nagdasok sa mga supermarket ang mga residente sa mga lungsod nga maagian sa Polo niadtong weekend aron mopalit og mga importanteng panginahanglanon, samtang gitabonan sa mga tag-iya sa negosyo ang ilang mga pultahan ug bintana isip pagpangandam sa bagyo. -Ato ni Bai