Hapit 6 milyong tawo naggamit og peke nga PWD IDs

Gihulagway ni Department of Justice (DOJ) Secretary Fredderick Vida niadtong Huwebes nga “very alarming” ang mga taho nga dul-an sa 6 milyong tawo ang naggamit og peke nga persons with disability (PWD) identification cards.

Gipahayag kini ni Vida human nagpagawas og datos ang National Council on Disability Affairs (NCDA) nga nagpakita nga gibana-banang 8.5 milyong tawo ang naggamit og PWD IDs, bisan pa nga 2.8 milyon lamang ang rehistradong PWDs sa nasod.

Nagpasidaan si DOJ Chief State Counsel Dennis Chan nga ang mga indibidwal nga mapamatud-ang naggamit og peke nga PWD IDs mahimong kasuhan og falsification of public documents ug estafa through falsification.

Matod niya, mahimo usab nga papanubagon ang mga opisyal sa gobyerno nga nalambigit sa pag-isyu sa maong mga ID ug ang mga doktor nga nagpagawas og peke nga medical certificates.

Giklaro ni Chan nga dili mahimong obligahon sa mga negosyo ang ilang mga kustomer nga ipa-verify una ang ilang PWD IDs sa dili pa ihatag ang mga benepisyo.

Apan matod niya, mahimo nilang ipa-validate ang ID pagkahuman kon adunay pagduhaduha sa pagka-autentiko niini.

Matod ni Vida, gisugdan na ang pagpatuman sa usa ka sistema sa PWD IDs nga mahimong ma-verify, apan posibleng mokabat og duha hangtod tulo ka tuig una kini hingpit nga mapatuman.

-Ato ni Bai