Gisalikway sa Vatican ang sugyot nga tugotan ang kababayen-an sa pagwali panahon sa Misa

Gipamatud-an pag-usab sa Vatican niadtong Martes ang dugay nang lagda nga ang usa lamang ka ordinadong pari o diyakono ang mahimong mohatag sa homiliya panahon sa Misa Katolika, pinaagi sa pagsalikway sa hangyo sa mga obispo sa Germany nga palapdan ang maong praktis aron matugotan usab ang mga kababayen-an ug ubang layko nga makawali.

Sa pahayag sa Dicastery for Divine Worship and the Discipline of the Sacraments, nga nagdumala sa mga kalihokan sa pagsimba sa 1.4 bilyon ka mga Katoliko sa kalibotan, giingon nga ang kasamtangang lagda “dili mahimong isantabi.”

Kasagaran nga bahin sa Misa ang homiliya, diin ang pari o diyakono naghatag og pagpamalandong sa mga pagbasa gikan sa Bibliya alang sa maong adlaw. Sa sayong bahin ning tuiga, mihangyo ang German Bishops’ Conference nga tugotan usab ang mga layko sa paghatag og homiliya.

Ang maong hangyo nagpakita sa susamang pagbati sa daghang mga obispo sa Estados Unidos ug uban pang nasod sa Europa, nga nagtuo nga adunay mga layko nga parehas ang kahibalo ug abilidad sa pagwali sama sa mga pari. Ilang gipunting usab ang panginahanglan nga madungog ang mga tingog sa kababayen-an, nga dili mahimong maordinahan isip pari sa Simbahang Katolika.

Wala ipagawas sa Vatican ang tibuok tubag niini ngadto sa mga obispo sa Germany, apan usa lamang ka mubo nga pahayag nga naglangkob sa desisyon niini.

Matud sa Vatican, ang pagreserba sa homiliya alang lamang sa mga pari ug diyakono dili lang usa ka administratibong lagda, kondili naggikan sa kinaiyahan mismo sa liturhiya.

Gitudlo sa Simbahang Katolika nga sa panahon sa Misa, ang pari naglihok “in persona Christi” o isip representasyon ni Kristo, ug nga ang Diyos nagalihok pinaagi kaniya sa panahon sa pagsimba.

Bisan pa niini, gitugotan gihapon ang mga layko sa paghatag og mga wali o pagpamalandong sa ubang serbisyo sa pag-ampo nga dili bahin sa Misa.

-Ato ni Bai