Gipalapdan ang pagpangita sa mga nawala sa sunog sa ferry sa Palawan

Gipalapdan niadtong Huwebes ang search and rescue operation sa baybayon sa Palawan human nasunog ang usa ka passenger ferry, nga nakapatay og lima ka tawo ug nakapawala sa daghang pasahero.

Matod sa Philippine Coast Guard (PCG), daghang barko ug ubang kagamitan ang gipadala aron mangita og mga survivor, samtang gigamit sa rescue teams ang drift-modelling tools aron matino ang mga lugar diin posibleng naanod sa sulog ang mga pasahero.

Base sa manifest sa barko, 43 na ang naluwas ug lima ang gikumpirmang namatay. Gibanabana sa mga awtoridad nga kapin 80 pa ka tawo ang wala makit-i, apan mahimo pa kining mausab.

Matod ni Coast Guard spokesperson Commodore Noemie Cayabyab, dili pa makasulod ang mga rescuer sa barko tungod sa baga nga aso, grabeng kainit, ug peligro sa posibleng pagbuto.

Makita sa drone footage nga gipagawas sa Coast Guard ang nasunog ug nangitngit nga ferry nga gilibotan sa tin-aw nga asul-berdeng tubig, samtang padayon pa kining nagbuga og aso pipila ka oras human nagsugod ang sunog niadtong Miyerkules sa gabii.

Matod ni Cayabyab, nakalista sa manifest ang 117 ka pasahero ug 17 ka tripulante. Mibiya ang ferry gikan sa Baseco sa Manila ug padulong unta sa Coron, Palawan, usa ka popular nga destinasyon sa mga turista tungod sa diving sites, mga baybayon, ug island-hopping attractions.

Lakip sa 43 ka naluwas ang duha ka Chilean nationals, matod ni Aileen Ausente, spokesperson sa PCG sa Palawan. Dugang niya, andam usab ang mga aircraft nga motabang sa rescue operations kon motugot ang panahon.

Mianod palayo ang nasunog nga ferry gikan sa orihinal nga lokasyon niini tungod sa sulog ug hangin, nga nakapalisod pa sa pagpangita ug pagluwas, matod ni Cayabyab.

Padayon pa ang imbestigasyon sa hinungdan sa sunog.

Komon nga paagi sa transportasyon sa Pilipinas ang pagsakay og ferry tungod kay ang nasod adunay kapin 7,600 ka isla ug milyon-milyong tawo ang nagsalig sa mga barko sa pagbiyahe tali sa mga probinsya.

Daghang nangaging trahedya sa ferry sa nasod ang nalambigit sa sobra nga karga, daotang panahon, ug luag nga pagpatuman sa mga lagda sa kaluwasan. -Ato ni Bai