El Niño gilaom nga mokusog pa ug molungtad hangtod Pebrero 2027

Gilaom nga mokusog pa ang El Niño karong tuiga sa dili pa kini moabot sa labing kusog nga kahimtang sa Disyembre, samtang hapit 100% nga sigurado nga molungtad kini hangtod Pebrero 2027, sumala sa World Meteorological Organization (WMO) sa binulan nga taho niini bahin sa klima niadtong Huwebes. Gilaom usab nga makalapas sa naandang rekord ang kainit sa ibabaw sa dagat.

"WMO forecasts indicate a near-100% likelihood that (El Niño) will persist through February 2027, potentially being one of the strongest since at least 1950," matod ni WMO Secretary General Celeste Saulo sa usa ka pahayag nga gipagawas uban sa taho.

Sumala sa ahensya sa United Nations, gilaom nga mosaka sa rekord nga 3.7 degrees Celsius (6.7 degrees Fahrenheit) labaw sa normal ang temperatura sa ibabaw sa dagat sa sentral ug sidlakang bahin sa tropikal nga Pacific Ocean gikan Oktubre hangtod Disyembre. Kini nga rehiyon mao ang sentro sa El Niño.

Ang gibanabanang pagsaka sa temperatura mas taas kaysa miaging rekord nga 2.6 degrees Celsius gikan Nobyembre 2015 hangtod Enero 2016, sumala sa WMO.

"The ocean it's drawing from is the warmest we've ever measured it. There is simply more heat available to release," matod ni Saulo.

Ang El Niño mao ang init nga bahin sa natural nga siklo sa El Niño-Southern Oscillation, usa ka kahimtang sa klima nga nakaapekto sa panahon sa tibuok kalibotan.

Kasagaran kining hinungdan sa pagsaka sa temperatura sa kalibotan ug pagbag-o sa pag-ulan sa dagkong rehiyon, nga mahimong mosangpot sa hulaw sa ubang lugar ug kusog nga pag-ulan sa uban. Kasagaran usab kining mahitabo matag duha hangtod pito ka tuig.

Miabot sa 16.96 degrees Celsius ang kasagarang temperatura sa tibuok kalibotan niadtong Agosto, nga kapareho sa Hulyo 2023 isip labing init nga bulan nga natala, sumala sa Copernicus Climate Change Service sa European Union.

Gitagna sa mga tigdukiduki sa Climate Impact Lab sa University of Chicago niaging bulan nga ang gitawag nga "super-El Niño" karong tuiga mahimong mosangpot sa hangtod 451,000 ka dugang nga kamatayon sa tibuok kalibotan gikan Hunyo hangtod Pebrero 2027. -Ato ni Bai