Ebola Outbreak sa Congo Posibleng Makontrol Sulod sa Tulo ka Bulan

Miingon ang usa ka opisyal sa World Health Organization nga posible gihapon nga makontrol ang Ebola outbreak nga mas paspas ang pagkaylap kaysa sa mga paningkamot sa pagpugong niini ug nahimo nang ikaduhang pinakakamatay nga Ebola outbreak nga natala.

Miingon ang global health agency sayo ning bulana nga posibleng mapahunong ang pagkaylap sa Ebola sulod sa tulo ka bulan, apan sukad niadto, adunay mga timailhan nga misamot kini ug mikaylap ngadto sa ikaunom nga probinsya.

“About the next plan for the three months, yes, if you have the necessary resources, I think it will be possible to do that,” matod ni Thierno Balde, WHO incident manager, ngadto sa mga reporter sa Geneva pinaagi sa video link gikan sa Bunia, sa Democratic Republic of Congo.

Nakapatay na og labing menos 2,325 ka tawo ang outbreak, nga mao ang pinakagrabe sa 17 ka Ebola outbreak nga nasinati sa Congo. Kulang pa karon ang mga kapanguhaan kumpara sa gikinahanglan, ug nakatigom ang WHO og mga 60% sa $115 million nga target niini alang sa Ebola response.

Bisan pa niini, gipakusog ang mga paningkamot sa pagpugong sa outbreak ug nadugangan og 400 ka higdaanan sulod sa miaging duha ka semana, matod ni Balde.

Magpulong ang WHO Emergency Committee niadtong Martes aron hisgutan ang outbreak, nga gideklarar sa U.N. agency niadtong Mayo 17 isip usa ka global emergency. -Ato ni Bai