Duha patay ug 35 angol sa mass shooting sa street party sa Georgia

Namatay ang duha ka tawo ug naangol ang 35 human sa pagpamusil sayo sa Domingo atol sa usa ka block party sa Georgia, matod sa lokal ug state officials.

Matod ni Dooly County Sheriff Craig Peavy sa usa ka news conference, duha ka lalaki nga nag-edad og 21 ug 23 ang gipusil ug namatay sa Vienna, Georgia, mga 135 miles (216 km) habagatan sa Atlanta. Naangol ang 35 ka tawo, kadaghanan tungod sa mga samad sa bala, matod sa mga opisyal sa mga tigbalita.

Matod nila, gatusan ka tawo ang mitambong sa kalihokan, nga gihimo sa pagtapos sa homecoming week sa Dooly County High School.

Wala motuo ang mga awtoridad nga aduna pay hulga sa publiko, apan wala pa sila maghingalan sa bisan kinsang suspetsado o person of interest, ug wala pa usab matino ang motibo sa pagpamusil.

“We don’t want to presume as to what caused it,” matod ni Chris Hosey, director sa Georgia Bureau of Investigation.

Nag-edad og 14 hangtod 51 ang mga naangol, matod sa mga opisyal. -Ato ni Bai