Duha Patay sa Pagbaha sa Catalonia Region sa Spain

Namatay ang duha ka tawo samtang usa pa ang nawala human sa kusog nga ulan ug pagbaha sa Catalonia region sa Spain, matod sa mga awtoridad niadtong Domingo.

Gikumpirma ni Catalan leader Salvador Illa ang kamatayon sa usa ka lalaki human natumpag ang usa ka bungbong sa Tordera, usa ka lungsod sa amihanan sa Barcelona, pinaagi sa mensahe sa iyang social media account niadtong Domingo.

Namatay usab ang usa ka tawo sa Montornès del Vallès, matod sa mga bombero niadtong Domingo, samtang nangita ang emergency services sa usa ka nawalang tawo sa Pineda de Mar, usa ka lungsod nga 52 km (32 miles) sa amihanan sa Barcelona.

Nagpagawas ang mga awtoridad sa Catalonia og red alert ug giawhag ang mga tawo nga magpabilin sulod sa ilang mga balay gikan alas-8 sa gabii (1800 GMT) niadtong Sabado hangtod alas-2 sa hapon (1200 GMT) sa Domingo tungod kay posibleng moigo sa amihanan-sidlakang rehiyon ang usa ka “mini-hurricane,” uban sa dugang kusog nga ulan nga gipaabot.

Gibahaan ang mga balay ug nalubog sa tubig ang mga sakyanan sa Bellvitge ug Cornella duol sa Barcelona human sa kusog kaayong ulan niadtong Sabado. Nakita usab ang mga itik nga naglangoy sa dagkong natigom nga tubig sa mga motorway sa Barcelona.

Miingon niadtong Sabado si Sarai Sarroca, director sa regional weather service Meteocat, nga ang sentro sa talagsaong weather system anaa ibabaw sa Mediterranean ug posibleng moabot sa yuta sa Catalonia ang usa ka “mini-hurricane.”

Gikansela o nalangan ang mga flight sa Barcelona airport, sumala sa taho sa La Vanguardia newspaper niadtong Sabado.

Naapektuhan sa kusog nga pagbaha ang tanang local trains. Sayo nga nagsira ang mga tindahan, gikansela ang mga duwa sa football, ug gikansela usab ang pasundayag sa Verdi’s Aida sa Barcelona’s Liceu opera house. -Ato ni Bai