Duha ka Saudi oil tankers giatake sa Strait of Hormuz

Giatake sa wala mailhing mga projectile ang duha ka supertanker nga nagkarga og lana gikan sa Saudi Arabia sulod lamang sa pipila ka minuto nga gilay-on samtang nagbiyahe paggawas sa Strait of Hormuz sa ulahing bahin sa Lunes, sumala sa shipping intelligence ug tracking firms nga Marisks ug Kpler.

“The near-simultaneous incidents represent a further escalation in the threat environment within the Omani corridor,” matod sa Marisks.

Nagkarga ang matag tanker og 2 milyones ka barrel sa Saudi crude oil sa Juaymah terminal niaging semana, sumala sa datos sa Kpler. Gipadayon pag-usab sa Saudi Aramco ang pagkarga ug pagbaligya sa lana gikan sa sulod sa strait niadtong Agosto.

Dako ang pagkunhod sa energy exports gikan sa Gulf tungod sa mga blockade sa Iran ug U.S. sa Strait of Hormuz samtang ang duha ka bahin naningkamot sa pagpakita sa ilang awtoridad sa maong agianan sa tubig.

Wala pa makab-ot og klarong kasabutan ang mga paningkamot sa mga tigpataliwala, lakip ang Qatar ug Oman, aron maablihan pag-usab ang strait, nga giagian sa mga ikalima nga bahin sa global oil supplies sa wala pa gilunsad sa U.S. ug Israel ang mga pag-atake sa Iran kapin unom ka bulan na ang milabay.

Misaka ang presyo sa lana niadtong Martes human gihulga ni U.S. President Donald Trump ang dugang nga mga pag-atake batok sa Iran, human sa unang pagbinayloay og pagpabuto sukad sa ulahing bahin sa Hulyo.

Sa pinakabag-ong mga pag-atake sa mga barko, naigo sa wala mailhing mga projectile ang Saudi Arabian-flagged very large crude carrier Sidr mga 16.6 nautical miles sa amihanan-sidlakan sa Khasab, Oman, mga alas-1952 UTC (GMT), matod sa Marisks.

Pipila ka minuto ang milabay, gikatahong naigo sa tulo ka wala mailhing mga projectile ang Liberian-flagged VLCC Senegal Prosperity, mga 17 nautical miles sa sidlakan sa Khasab, matod sa Marisks. Luwas ang tanang crew nga sakay niini, dugang sa kompanya.

Gikataho sa United Kingdom Maritime Trade Operations agency nga tulo ka projectile ang miigo sa usa ka tanker sa samang lugar samtang nagbiyahe kini paggawas sa Strait of Hormuz, nga daw mao ra gihapon ang maong insidente.

Wala dayon mitubag sa mga hangyo alang sa komento ang Bahri, operator sa Sidr, ug Sinokor, operator sa Senegal Prosperity.

Sayo niadtong Martes, gikataho sa Iranian media nga gipahunong ang usa ka Saudi oil tanker samtang nagbiyahe agi sa southern corridor sa Strait of Hormuz.

-Ato Ni Bai