DOH, nag-awhag sa pagsul-ob og face mask, pagpabilin sulod sa balay tungod sa aso gikan Indonesia

Giawhag sa Department of Health (DOH) niadtong Martes ang publiko nga magsul-ob og N95 face masks ug limitahan ang mga kalihokan sa gawas human nakaabot sa pipila ka bahin sa Luzon ug Visayas ang aso gikan sa forest fires sa Kalimantan, Indonesia, tungod sa southwest monsoon o “habagat.”

Sa usa ka advisory, mipasidaan ang DOH nga ang maong aso adunay hugaw nga hangin nga nasagolan og pino nga aso, abog, ug abo nga mahimong hinungdan sa kalit nga mga problema sa pagginhawa ug iritasyon sa mata.

“Maaaring magdulot ang haze ng hirap sa paghinga, pag-ubo, pananakit ng dibdib, pangangati o pagluluha ng mga mata, at paglala ng mga sakit sa baga tulad ng hika. Dobleng pag-iingat ang kailangan para sa mga bata, matatanda, at mga may dati nang sakit sa baga o puso,” matod niini.

Aron maminusan ang exposure, gilatid sa ahensya ang pipila ka mga paagi sa pagpanalipod alang sa mga apektadong komunidad, lakip ang pagpabilin sulod sa balay, pagsira sa mga pultahan ug bintana aron dili makasulod ang aso, pag-amping sa pagmaneho, ug pagsul-ob og protective masks.

Gitambagan sa DOH ang publiko nga magsul-ob og N95 masks kung mogawas.

Kung walay N95 masks, mahimong mogamit ang publiko og basa nga panyo o panapton. Mahimo usab ang pagsul-ob og duha ka mask o pagpilo og kaduha sa panyo o panapton isip alternatibong panalipod aron maminusan ang masuyop nga mga partikulo.

“Alamin ang lagay ng hangin sa inyong lugar at unahin ang kaligtasan,” matod sa DOH.

Gipahinumdoman usab niini ang publiko nga tawagan dayon ang National Emergency Hotline 911 alang sa dinaliang medikal nga tabang. -Ato ni Bai