DOH Nag-andam sa mga Ospital sa Posibleng Epekto sa Super El Niño

Gipalig-on sa Department of Health (DOH) ang pagpangandam sa mga ospital ug pagbantay sa mga huyang nga grupo aron maminusan ang risgo sa panglawas tungod sa grabeng kainit taliwala sa mga hisgot bahin sa “Super El Niño,” matod ni Health Secretary Edwin Mercado niadtong Lunes.

Atol sa press briefing sa Malacañang, matod ni Mercado nga gitutokan sa departamento ang pagpugong sa mga sakit tungod sa kainit ug pagsiguro nga makapadayon sa operasyon ang mga ospital bisan adunay posibleng pagkaputol sa suplay sa kuryente.

Matod niya, kinahanglan hatagan og espesyal nga pagtagad ang mga tigulang, mabdos, ug mga bata tungod kay lakip sila sa labing maapektuhan sa grabeng kainit.

“So, iyon po iyong kailangang bantayan natin, kaya nga nasabi ko dapat pong bisitahin, alagaan at kumustahin, hindi lamang po ng mga kamag-anak, pati po iyong mga Barangay Health Worker ay aatasan natin na bantayan po itong ating mga vulnerable population,” dugang niya.

Giawhag niya ang mga pamilya nga bisitahon matag adlaw ang ilang tigulang nga mga paryente aron masiguro nga makainom sila og tubig, makainom sa ilang tambal, ug makapahulay gikan sa kainit.

Matod niya, mahimong ablihan ang mga bintana o mogamit og mga gamit nga magbuga og pino nga wisik sa tubig, kay dili kanunay kinahanglan ang air-conditioning ug dako usab kini og konsumo sa kuryente.

Sa pagtubag bahin sa posibleng banabana nga 6,500 ka tawo ang mamatay nga gihisgutan atol sa diskusyon, matod ni Mercado nga malikayan ang maong mga kamatayon.

Gipasabot niya nga daghan sa mga datos nga gihisgutan gikan sa mga nasod diin nagpuyo nga nag-inusara ang mga tigulang, samtang ang naandang pagpuyo nga duol sa dagkong pamilya sa Pilipinas mahimong makatabang sa adlaw-adlaw nga pagbantay ug pag-atiman.

Bahin sa pagpangandam sa mga ospital, matod ni Mercado nga mahimong mameligro ang mga pasyenteng naggamit og respirator panahon sa pagkawala sa kuryente ug mahimo usab madaot ang mga tambal nga kinahanglan ibutang sa bugnaw nga tipiganan.

“At mayroon po kaming agreement with the Office of Civil Defense na ang healthcare po ay priority mabigyan ng fuel kung sakali pong umabot sa gaanong mga pagkakataon,” matod niya.

Nagpagawas usab ang DOH og mga pahimangno batok sa dugay nga pagpabilin ilawom sa adlaw ug nagrekomendar og mga pahulay tungod sa kainit alang sa mga tawo nga nagtrabaho sa gawas.

Gipahinumdom ni Mercado nga kinahanglan moinom og unom hangtod walo ka baso nga tubig aron dili mauga ang lawas.

Gawas sa heat stroke ug kakulang sa tubig sa lawas, gibantayan usab sa departamento ang dengue ug mga sakit nga makuha gikan sa kontaminadong tubig sama sa typhoid ug cholera.

Matod ni Mercado, andam na ang mga grupo nga nagbantay sa mga kaso ug igo ang suplay sa mga tambal.

Giawhag usab niya ang pagdonar og dugo aron mapadayon ang igong suplay sa mga sangkap sa dugo nga mahimong gikinahanglan kon mosaka ang mga kaso sa dengue.

“Kami po ay gagawa rin ng sistema para po mayroon tayong supply ng dugo na maari pong kailanganin doon po sa pagkakataon magkaroon po ng surge ng dengue,” matod niya.

Gipasabot niya nga kasagarang mosaka ang mga kaso sa dengue human sa ulan ug mahimong mokunhod kon mamala ang mga dapit nga pangitlogan sa lamok.

Alang sa mga mabdos, gihisgutan niya ang gipalapdan nga maternal care package sa PhilHealth nga naglakip sa walo ka prenatal visits.

Pinaagi sa kanunay nga pagkonsulta sa mga obstetrician o midwife sa mga birthing center, mabantayan sa mga tig-atiman sa panglawas ang pagtubo sa bata sulod sa tiyan ug mahatagan ang mabdos sa gikinahanglang tabang, lakip ang dugang nga nutrisyon, protina, ug masustansiyang pagkaon.

Matod ni Mercado, lakip usab sa maong package ang ultrasound ug mga pagsusi alang sa mga virus ug ubang sakit.

Sa dihang gipangutana bahin sa pagtipig og tubig sa botelya, gisugyot niya ang paggamit og mga sudlanan nga bildo sa mga lugar nga adunay igong suplay sa tubig.

Gihisgutan niya ang mga pagtuon nga nagpakita sa posibleng kalambigitan sa microplastics sa diabetes ug ubang mga sakit.

Dugang niya, gimando ni President Ferdinand R. Marcos Jr. sa departamento ang pagpahigayon og kampanya sa pagpahibalo nga dili lamang kutob sa mga poster apan maglakip usab sa pagbisita sa mga panimalay sa mga barangay health worker.

-Ato ni Bai