Dalagitang Thai nakit-ang patay sulod sa maleta; Australiano gidakop

Nagsubo ang pamilya sa usa ka 17-anyos nga Thai nga dalagita nga nakit-ang patay sulod sa usa ka maleta sa Pattaya. Gidakop usab ang usa ka Australiano ug gipasakaan og kasong pagpatay may kalabotan sa maong insidente.

Gipahibalo sa kapulisan sa Thailand nga ilang gidakop sayong Sabado sa Suvarnabhumi Airport sa Bangkok ang usa ka Australiano nga nag-edad og kapin 40 ka tuig tungod sa maong pagpatay nga nahitabo sa Pattaya, mga 150 kilometro sa sidlakan sa Bangkok.

Ang suspek nga giila nga si Simon Peter Carman nag-atubang og mga kasong pagpatay, pagtago ug pagbalhin sa patayng lawas, paglaglag sa ebidensya, ug pagdala sa usa ka menor de edad alang sa seksuwal nga katuyoan.

Sumala sa kapulisan, ilang gisusi ang CCTV footage nga nagpakita kang Carman nga misulod sa usa ka condominium uban sa dalagita, apan migawas siya nga nag-inusara pipila ka oras ang milabay samtang nagdala og usa ka maleta.

Sa pahayag nga gipatik sa opisyal nga Facebook page sa kapulisan, gisakay ni Carman ang maleta sa usa ka motorsiklo ug gidala kini sa usa ka kasagbotan duol sa riles sa tren. Human niini, mipagawas ang kapulisan og warrant of arrest ug gidakop siya sa airport samtang nangandam nga mosakay og eroplano pauli sa Australia.

Atol sa imbestigasyon, mipasabot si Carman ngadto sa pamilya sa biktima sa dili pa siya ibalhin sa Pattaya Provincial Court.

“Naguol ko sa nahitabo sa inyong anak. Wala kini sa akong kontrol,” matod niya.

Miingon ang amahan sa biktima nga si Thongchai Donhomla, 46, nga lisod kaayo alang kaniya ang pagdawat sa pagkawala sa iyang anak.

“Naguol kaayo ko. Wala nay inahan akong anak, mao nga kung adunay iyang gusto, mangita gyud siya og paagi. Kanunay usab siya nga motabang kanako,” matod niya.

Miingon usab ang iyang ugangan nga si Oradee Bussarakum nga gusto niyang mapahamtangan ang suspek sa pinakabug-at nga silot.

“Giingnan nako ang kapulisan nga gusto nako siyang silotan og kamatayon. Isip usa ka inahan, wala na koy laing ikasulti. Gusto lang nako nga maatubang niya ang tanang konsekuwensya sa iyang gibuhat,” matod niya.

Wala pa mipahibalo ang kapulisan kung kanus-a unang moatubang sa korte si Carman.

-Ato ni Bai