Comelec nagdahom og mas daghang magparehistro sulod sa 8 ka bulan

Nagpaabot ang Commission on Elections (Comelec) nga mas daghang Pilipino ang magparehistro sa walo ka bulan nga voter registration nga sugdan pag-usab karong Nobyembre, isip pagpangandam sa Mayo 2028 National and Local Elections (NLE).

Matod ni Comelec Chairperson George Garcia, nagdahom sila nga daghan ang magparehistro tungod sa taas nga panahon nga gigahin alang sa voter registration.

“Consequently, we can expect that those who register, transfer, or reactivate their status will be able to participate in the 2028 national and local elections, as well as the Barangay and SK elections (BSKE). We anticipate a high volume of registrants given the extended timeframe,” matod ni Garcia sa usa ka interbyu niadtong Sabado.

Plano sa Comelec nga sugdan pag-usab ang voter registration sa tungatunga sa Nobyembre ug ipadayon kini hangtod sa kataposan sa Hulyo 2027.

Sa dihang gipangutana nganong kutob lamang sa Hulyo 2027 ang registration period, mipasabot si Garcia:

“We want to ensure the voter list, the project of precincts, and ERB (Election Registration Board) hearings are properly prepared, making this the ideal period for the Comelec to conduct the process.”

Ablihan pag-usab sa Comelec ang voter registration human ibalhin sa Nobyembre 2028 ang Barangay and Sangguniang Kabataan Elections (BSKE).

Niadtong Huwebes, gipirmahan ni President Ferdinand R. Marcos Jr. ang Republic Act 12326, nga nagtino nga lima ka tuig ang termino sa mga opisyal sa barangay ug mga miyembro sa Sangguniang Kabataan, ug nagbalhin sa BSKE ngadto sa Nobyembre 2028.