Christa Pike nga Nakalahutay sa Lethal Injection sa Tennessee Nakamatngon Na

Nakamatngon na ug nakasulti ang 50 anyos nga si Christa Pike, usa ka napriso nga nakombikto sa pagpatay ug nakalahutay sa pagsulay sa Tennessee nga patyon siya pinaagi sa lethal injection niaging semana. Matod sa iyang mga abogado sa pahayag niadtong Martes, napakyas ang unang pagsulay sa estado sulod sa duha ka siglo nga patyon ang usa ka babaye.

Bisan pa sa grabeng kadaot sa iyang mga bukton tungod sa pagsulod sa mga dagom alang sa intravenous (IV) lines atol sa wala madayon nga pagpatay niadtong Miyerkules, si Pike "still handcuffed and shackled" sa iyang higdaanan sa ospital samtang padayon siyang gitambalan, sumala sa iyang grupo sa mga abogado nga gihatag sa gobyerno.

"Her prognosis remains unclear, but at a minimum we expect a long recovery," matod sa mga abogado, nga midugang nga adunay gitakdang pagdungog sa kaso ni Pike karong Miyerkules sa Davidson County Chancery Court.

May kalabotan ang pagdungog sa hangyo sa iyang mga abogado nga magpagawas ang korte og mando aron mapreserbar ang mga ebidensya sa napakyas nga pagpatay. Matod sa tigpamaba, nagtuo ang mga abogado nga kini magpakita nga gilapas sa Tennessee Department of Correction ang konstitusyonal nga mga katungod ni Pike pinaagi sa pagpailalom kaniya sa mapintas ug dili kasagarang silot.

Wala gilauman nga motambong si Pike sa maong pagdungog.

Gisentensiyahan si Pike og kamatayon tungod sa iyang papel sa pagtortyur ug pagpatay sa iyang 19 anyos nga kaeskwela nga si Colleen Slemmer tulo ka dekada na ang milabay, sa dihang tin-edyer pa siya. Nakalahutay siya sa pagsulay sa pagpatay kaniya niadtong gabii sa Setyembre 30 sa Riverbend Maximum Security Institution sa Nashville, ang kapital sa Tennessee. Sukad niadto, nagpabilin siya sa ospital.

Matod sa iyang mga abogado niadtong Biyernes, wala pa makamatngon si Pike, kritikal ang iyang kahimtang ug naggamit og ventilator aron makaginhawa samtang naningkamot ang mga doktor nga makuha sa iyang lawas ang tambal nga pentobarbital.

"Against all odds, Christa Pike is conscious, speaking and continues to receive critical medical care," matod sa mga abogado niadtong Martes.

Gipunting sa hangyo ni Pike alang sa clemency, nga gisalikway ni Republican Governor Bill Lee niaging semana, nga wala hatagi og igong pagtagad sa iyang sentensiya nga kamatayon ang mga trauma nga iyang nasinati sa pagkabata, lakip ang seksuwal nga pag-abuso, pagpabaya ug wala matambali nga sakit sa pangisip.

Sulod sa dugay nga panahon, si Pike ang bugtong babaye nga naghuwat sa pagpatuman sa sentensiya nga kamatayon sa Tennessee. Matod sa iyang mga abogado, hapit na usab siya mag-30 ka tuig nga nag-inusarang napriso ug gilain sa ubang mga piniriso.

Gikan sa pagkahimong unang babaye nga gisulayang patyon sa Tennessee sukad sa unang bahin sa ika-19 nga siglo, si Pike nahimong unang tawo sa Estados Unidos nga nahibal-ang nakalahutay human mahatagan og mga tambal alang sa pagpatuman sa sentensiya nga kamatayon.

Matod sa mga grupo nga supak sa silot nga kamatayon, gipakita sa insidente ang kinaiyanhong kabangis sa maong pamaagi. Gipadayag usab niini ang kalisod sa pagpatuman sa lethal injection samtang gisunod ang konstitusyonal nga pagdili sa mapintas ug dili kasagarang silot.

LETHAL INJECTION NGA NAPAKYAS

Gihulagway sa mga abogado ni Pike ug sa mga peryodistang nakasaksi sa pagsulay sa pagpatay kaniya ang nahitabo nga dul-an sa duha ka oras ug tunga nga kagubot ug dugay nga pag-antos. Nalisdan ang mga kawani sa Correction Department sa paghatag kaniya og duha ka dosis sa pentobarbital pinaagi sa ugat.

Nadungog si Pike nga naghangos, naghilak, nag-agulo ug kusog nga nagginhawa sa dakong bahin sa proseso. Sa usa ka higayon, miingon siya, "My arm feels like it's about to burst open."

Tungod sa napakyas nga pagsulod sa mga IV lines, ang duha ka bukton ni Pike nahimong "swollen, burned and blistered," sumala sa mga dokumentong gisumite sa iyang mga abogado sa korte. Gituohang tungod kini sa pentobarbital, usa ka kusog nga alkaline ug makadaot nga substansiya, nga mituhop sa mga tisyu ilalom sa iyang panit.

Giakusahan sa mga abogado ang mga opisyal sa estado nga wala tagda ang naunang mga pahimangno sa mga doktor ni Pike nga ang iyang gagmayng mga ugat ug sakit sa dugo makapalisod pag-ayo sa pagsulod sa mga IV lines.

Samtang nagpadayon ang proseso, misumite ang mga abogado ni Pike og dinaliang hangyo sa korte aron ipahunong kini. Apan niadtong higayona, gihunong na sa mga opisyal sa prisohan ang pagsulay sa pagpatay ug nagpatawag og ambulansiya, sumala sa mga rekord sa korte.

Niadtong gabii sa pagsulay sa pagpatay, gidepensahan sa Correction Department ang ilang pagdumala sa sitwasyon, nga nag-ingong ilang "followed every step of the state's lawful, established execution protocol." Apan, mipahawa na sa iyang katungdanan si agency commissioner Frank Strada ug mobiya sa iyang puwesto karong bulana, sumala sa gipahibalo sa gobernador niadtong Sabado.

Una nang gimando ni Lee ang pagsuspenso sa tanang gitakdang pagpatuman sa sentensiya nga kamatayon sa nahibiling bahin sa tuig ug ang pagpahigayon og imbestigasyon sa independente nga grupo bahin sa nahitabo sa kaso ni Pike.

30 KA TUIG NGA KASO

Duha ka adlaw sa wala pa ang gitakdang pagpatay kang Pike, gisalikway ni Lee ang hangyo nga usbon ang iyang sentensiya nga kamatayon ngadto sa kinabuhi nga pagkabilanggo nga walay posibilidad nga makagawas pinaagi sa parole.

18 anyos pa si Pike niadtong Enero 1995 sa dihang siya, ang iyang 17 anyos nga uyab nga si Tadaryl Shipp, ug usa pa ka kauban, midani kang Slemmer ngadto sa kakahoyan sulod sa University of Tennessee campus sa Knoxville ug mipatay kaniya.

Nakakuha og dakong pagtagad sa media niadtong panahona ang makalilisang nga pagpatay. Gikulitan ni Shipp og porma sa pentagram ang dughan sa biktima, samtang gibunalan ni Pike ang ulo ni Slemmer gamit ang usa ka tipak sa aspalto ug mikuha pa og tipik sa iyang bagolbagol isip handumanan. Sumala sa testimonya sa husay, giisip ni Pike si Slemmer nga kaagaw sa gugma sa iyang uyab.

Miangkon si Pike ug Shipp sa pagpatay ug silang duha nakombikto sa first-degree murder. Gisentensiyahan si Pike og kamatayon, samtang si Shipp gisilotan og kinabuhi nga pagkabilanggo nga adunay posibilidad nga makagawas pinaagi sa parole.

Ang ilang kaubang akusado nga si Shadolla Peterson, nga 18 anyos niadtong nahitabo ang pagpatay ug nagsilbing tigbantay samtang gihimo sa duha ang krimen, mitestigo alang sa prosekusyon ug nakadawat og probation. -Ato ni Bai