Cancer Vaccine sa Moderna ug Merck, Milampos Human sa Kapin 100 ka Tuig nga mga Pagsulay

Naa si Stephane Bancel, CEO sa Moderna, sa usa ka Lebanese restaurant ug nagsaulog sa birthday sa usa ka higala sa gabii sa Agosto 13 sa dihang nakadawat siya og tawag.

Nakab-ot sa mRNA cancer vaccine nga gihimo sa kompanya kauban ang Merck ang gitakdang tumong niini — ang unang kalampusan sa usa ka therapeutic cancer vaccine sa late-stage testing human sa kapin 100 ka tuig nga napakyas nga mga pagsulay.

Bisan wala pa mapagawas ang kompletong detalye sa trial, gibanabana na sa Wall Street nga mahimong moabot sa bilyon-bilyong dolyar ang halin niini.

Gitandi ni Bancel ang balita nga iyang nadawat sa maong tawag sa adlaw sa ulahing bahin sa 2020 sa dihang gipahibalo sa Moderna ang resulta sa trial sa COVID-19 vaccine niini.

“It was a moment that we’d worked really hard toward. We knew what was at stake for the planet with COVID,” matod ni Bancel sa usa ka interview. Pareho usab kini sa cancer, matod niya, ug midugang nga halos tanan maapektuhan sa maong sakit sa usa ka punto sa ilang kinabuhi.

Mubo ra ang maong higayon sa kalipay. “I went right away into, ‘OK, what are all the things we have to do?’”

Alang kang Dean Li, president sa Merck Research Laboratories, halos pareho usab ang nahitabo. Sa dihang gitawagan siya ni Eliav Barr, Merck’s head of global clinical development, aduna na siyay listahan sa mga buluhaton nga kinahanglan dayong buhaton: andamon ang datos alang sa presentasyon sa usa ka international cancer meeting, ipasulod kini alang sa review sa U.S. FDA, ug gamiton ang mga kalig-on sa pagtuon sa ubang nagpadayong trials.

“It isn’t hallelujah,” nahinumdom si Li. “It’s boom.”

GIUNSA NILA PAGKAB-OT NIINI

Alang sa Merck ug Moderna, resulta kini sa 10 ka tuig nga paningkamot, sumala sa walo ka kasamtangan ug kanhing executives sa mga kompanya.

Sa dihang gipahibalo nila ang partnership niadtong 2016 aron maghimo og cancer vaccine, kapin usa ka tuig nang nagtinabangay ang duha ka kompanya sa laing vaccine project.

Alang sa cancer collaboration, mibayad ang Merck og $200 million nga paunang bayad niadtong 2016 ug laing $250 million niadtong 2022. Gibahin sa duha ka kompanya ang gasto ug kita.

Niadtong panahona, ang Keytruda sa Merck misikat isip usa ka kusgan nga tambal sa bag-ong klase sa mga tambal nga gitawag og checkpoint inhibitors, nga makatabang sa immune system sa pagpakigbatok sa cancer pinaagi sa pagtangtang sa natural nga babag niini.

“What Keytruda taught the world was that, yes, there is an immune recognition of cancer, but cancer is clever in putting up barriers, and Keytruda removes those barriers,” matod ni Barr sa Merck atol sa usa ka interview sa ulahing bahin sa Mayo.

Sunod, matod niya, nangita ang mga kompanya, lakip ang Merck, og mga paagi aron mas mapakusog ang immune system, ug gisulayan ang Keytruda uban sa next-generation immunotherapy drugs sama sa TIGIT inhibitors. “It didn’t work,” matod ni Barr.

Si Tal Zaks, nga nagsilbing chief medical officer sa Moderna gikan 2015 hangtod 2021, mibalhin sa U.S. gikan sa Israel niadtong 1996 aron magtrabaho sa cancer vaccines sa National Cancer Institute.

“We failed back then, and we failed for many years,” matod ni Zaks.

Apan nagtuo siya nga ang bag-ong mga teknolohiya nga nakabase sa mRNA uban sa checkpoint inhibitors, ingon man ang mas barato nga genetic sequencing, mahimong moabli og dalan ngadto sa kalampusan.

PANGITA OG PARTNER

Aduna sa Moderna ang mRNA technology, apan isip bag-ong kompanya, dili pa niini makaya ang mahal nga cancer trials.

Matod ni Bancel, nakig-estorya ang Moderna sa mga kompanya nga adunay checkpoint inhibitors, apan pamilyar na kini sa Merck ug nakumbinsir sa kasinatian niini sa pagpahigayon sa Keytruda trials.

Ang Keytruda, nga gitawag ni Li sa Merck nga “miracle drug,” gigamit batok sa 20 ka nagkalainlaing matang sa cancerous tumors ug 45 ka matang ug hugna sa cancer. Apan nagpabiling misteryo kon unsang mga bahin sa tumor ang eksaktong gitarget sa tambal ug nganong mas maayo ang response sa pipila ka pasyente kaysa sa uban.

Ang messenger ribonucleic acid, o mRNA, anaa sa matag cell sa lawas. Trabaho niini ang pagdala sa genetic instructions gikan sa nucleus sa cell ngadto sa mga bahin nga naghimo og piho nga proteins.

Ang bakuna, nga nailhang intismeran autogene, nagbansay sa immune system sa pag-atake sa cancer cells pinaagi sa pagtarget sa mutations nga talagsaon sa tumor sa matag pasyente.

Napakyas ang nangaging cancer vaccines nga misulay sa pagbansay sa immune system aron targeton ang usa o duha ka piho nga tumor mutations.

Nakahukom ang mga kompanya nga sulayan ang bakuna batok sa melanoma, nga usa sa mga cancer nga adunay pinakadaghan nga mutations ug diin adunay maayong rekord sa kalampusan ang checkpoint inhibitors.

Nakahukom usab sila nga sulayan kini sa mga pasyente nga adunay early-stage melanoma human matangtang pinaagi sa operasyon ang ilang mga tumor. Naghatag kini sa mga kompanya og igong panahon aron makahimo og bakuna nga gipahaom base sa tumor sa matag pasyente ug dugang panahon aron makatubag ang ilang immune system.

Pinaagi sa mRNA technology, nakahimo ang mga kompanya sa pagtarget sa daghang mutations.

“You have many, many more shots on goal and therefore a much greater chance to succeed,” matod ni Moderna co-founder ug MIT scientist Robert Langer pinaagi sa email.

Gipares sa mga kompanya ang bakuna sa abilidad sa Keytruda nga i-activate ang T-cells sa immune system sa lawas nga mangita ug moatake sa abnormal nga cells.

“The whole special thing about Keytruda was that it would unlock the dogs of war,” matod ni Li.

Naghatag ang bakuna og 34 ka cancer targets nga espesipiko sa matag pasyente aron mailhan sa maong T-cells, matod niya, ug usa lamang niini ang kinahanglan molampos. “With the personalized cancer treatment, the dog has your scent.”

UNSAY SUNOD

Dakong benepisyo ang mahimong makuha sa duha ka kompanya kon maaprubahan ang bakuna. Posibleng maaprubahan kini sa U.S. sa sayo pa sa sunod tuig.

Sa ulahing bahin niining dekada, maatubang sa Merck ang pagka-expire sa patent sa Keytruda, nga hangtod bag-o lang mao ang pinakabaligyang tambal sa kalibotan. Alang sa Moderna, mahimo kining makatabang sa kompanya taliwala sa nagkahinay nga panginahanglan sa COVID shots ug makapaayo sa reputasyon niini.

Gisaway ni U.S. Health Secretary Robert F. Kennedy Jr. ang kaluwasan ug pagkaepektibo sa mRNA vaccines alang sa infectious diseases, nga walay ebidensya, ug giputol ang $500 million nga pondo alang sa may kalabotang mga proyekto.

Ang shares sa Moderna, nga mikunhod og mga 90% gikan sa kinatas-ang lebel niini panahon sa COVID, misaka og kapin sa 130% sukad gipahibalo ang resulta sa bakuna. Gibanabana sa Wall Street analysts nga molapas sa $1 billion ang halin niini sa 2030 ug $3 billion sa 2035, sumala sa LSEG data.

Ang sunod nga pagsulay mao ang pagtino kon molampos ba ang maong pamaagi sa mga cancer nga adunay mas gamay nga mutations, lakip ang lung, kidney ug pancreatic cancers.

Sa umaabot nga panahon, plano sa mga kompanya nga susihon pag-ayo ang melanoma data aron makita kon mahimo pa nilang mapauswag ang bakuna.

“I don’t think this is our last version of intismeran,” matod ni Bancel. -Ato ni Bai