Bangladesh Nagplano sa Pagsulay sa Bakuna Batok Dengue Tungod sa Pagsamot sa Outbreak

Gikonsiderar sa Bangladesh ang pagpahigayon og clinical trials sa bakuna batok sa dengue human liboan ka pasyente ang naospital ug gatosan ang namatay tungod sa sakit, matod sa usa ka ministro niadtong Martes.

Kapin 90,350 ka tawo ang naospital tungod sa dengue ug 281 ang namatay sukad sa pagsugod sa tuig, sumala sa datos sa health ministry.

Samtang nagkagrabe ang outbreak, niining Oktubre lamang, 10,736 ka tawo ang naospital ug 36 ang namatay sa nasod nga ang sistema sa panglawas grabeng nabug-atan usab sa outbreak sa measles nga nakapatay na og kapin 1,100 ka bata.

Ang bag-ong pag-ulan nakamugna og maayong kondisyon aron modaghan ang mga lamok, nga nagpatungha og kabalaka nga mahimong mosamot pa ang dengue outbreak. Mokatap ang virus pinaagi sa paak sa lamok ug mahimong hinungdan sa hilanat ug grabeng kasakit sa kaunoran ug mga lutahan.

Matod ni State Minister for Health M.A. Muhit sa mga reporter, nakit-an na ang tanang upat ka matang sa virus, nga nagpasabot nga mas dako ang posibilidad nga balik-balik nga matakdan ang mga tawo tungod kay ang resistensya batok sa usa ka matang, o serotype, dili makahatag og resistensya batok sa laing tulo.

“With all four dengue serotypes now circulating in Bangladesh, we are considering conducting vaccine trials in the country,” matod ni Muhit.

Matod sa mga eksperto sa panglawas, dili na lamang sa dagkong mga siyudad nagtapok ang mga kaso sa dengue ug dili igo ang pag-spray aron mapugngan ang pagkaylap niini gawas kon mawagtang ang mga dapit nga pangitlogan sa lamok.

Ang bisan unsang pagsulay sa bakuna, nga mahimong kabahin sa dugayng pamaagi sa pagsumpo sa sakit, kinahanglan una nga aprobahan sa mga awtoridad.

Nasinati sa Bangladesh ang labing makamatay nga dengue outbreak nga natala sa nasod niadtong 2023, diin kapin 1,700 ka tawo ang namatay.

-Ato ni Bai