Bagyong Dujuan sa Japan Mikalas og Upat ka Kinabuhi

Nakapahinabo og landslide ang kusog nga ulan dala sa makusog nga bagyo nga mihampak sa Pacific coast sa Japan, nga mikalas og upat ka kinabuhi samtang unom ang missing, matod sa public broadcaster nga NHK niadtong Martes, samtang naputol usab ang suplay sa kuryente sa mokabat sa 45,000 ka panimalay.

Ang Typhoon Dujuan mao ang pinakabag-ong grabeng panghitabo sa panahon karong tuiga nga adunay talagsaong kakusog sa ulan, baha, ug tropical cyclones nga miigo sa nagkalain-laing rehiyon sa tibuok kalibotan, gikan sa East Asia hangtod sa North America ug Europe.

Namatay ang usa ka babaye nga kapin 60 anyos human misulod ang lapok sa usa ka balay sa Yokosuka City sa Kanto region, human sa mga landslide sa Kanagawa ug Chiba, matod sa broadcaster, nga midugang nga ang tulo pa ka namatay nag-edad gikan sa kapin 50 hangtod kapin 80 anyos.

Gipanglimpyo sa mga rescuer ang mga debris sa Miura City, nga nahimutang usab sa Kanagawa sa habagatan sa kapital nga Tokyo, samtang gipangita nila ang usa ka missing nga tawo sa balay nga naigo sa landslide.

Gipanglimpyo sa usa ka residente ang baga nga lapok gikan sa duol nga dalan human mipaingon sa amihanan-sidlakan ang bagyo palayo sa Japan.

Mokabat sa 45,000 ka panimalay sa rehiyon ang walay kuryente, matod sa Tokyo Electric Power Co 9501.T sa website niini.

Miingon si Richard Yonamine, 37, nga gibahaan ang iyang balay sa Sakura City sa Chiba human miawas ang duol nga suba tungod sa kusog nga ulan, nga mao lamang ang iyang nasinati nga ingon niini sulod sa kapin tulo ka dekada.

“I’m scared if it starts raining … I worry that as soon as it starts pouring, it’ll turn into a major problem,” matod ni Yonamine.

Nakapahinabo usab og lapad nga pagbaha ang kusog nga ulan sa Chiba niaging bulan, nga naka-stranded sa mga pasahero sa busy nga Narita airport, samtang matod sa media, kapin sa 10,000 ka sakyanan ang nadaot nga dili na maayo. -Ato ni Bai