Aso Gikan sa mga Sunog sa Indonesia, 1.4 Milyon ka Estudyante Nag-Remote Learning

Mibalhin sa online learning ang mokabat sa 1.4 milyon ka estudyante sa unom ka probinsya sa Indonesia tungod sa dili maayong kalidad sa hangin nga gipahinabo sa mga sunog sa lasang ug kayutaan, matod sa usa ka opisyal niadtong Miyerkules.

Sukad niadtong Setyembre 2, mokabat sa 1.43 milyon ka estudyante gikan sa 12,874 ka eskwelahan sa unom ka probinsya nga grabeng naapektuhan sa mga sunog sa lasang ug kayutaan ang nagtuon pinaagi sa remote learning, matod ni Gogot Suharwoto, opisyal sa education ministry, ngadto sa media.

Gipalig-on sa Indonesia ang mga paningkamot aron makontrol ang aso nga gipahinabo sa mga sunog sa unom ka probinsya, lakip ang Riau, Jambi ug South Sumatra sa isla sa Sumatra, ingon man ang West Kalimantan, Central Kalimantan ug South Kalimantan sa Borneo.

Sa 1.43 milyon ka estudyante, 1.1 milyon ang anaa sa West Kalimantan, matod ni Gogot, ang probinsya nga nakarekord sa pinakadakong gilapdon sa mga sunog hangtod karong tuiga.

Molungtad ang remote learning gikan Agosto 31 hangtod Setyembre 4 ug padayon kining susihon matag tulo ka adlaw, matod ni Gogot.

Matod niya, ang desisyon sa pagpahigayon og online learning ibase sa Air Pollution Standard Index sa matag rehiyon.

Ipatuman ang remote learning kung molapas sa 200 ang index sa usa ka lugar, dugang ni Gogot.

Kadaghanan sa mga rehiyon sa Kalimantan nakarekord og lebel sa polusyon sa hangin nga milapas sa 200 niadtong Miyerkules, samtang ang pipila milapas pa gani sa 1,000, sumala sa datos sa Forestry Ministry. Ang Southeast Pontianak sa West Kalimantan province maoy labing grabeng naapektuhan, diin nakaabot sa 1,023 ang lebel.

Giisip sa sistema sa Indonesia sa pagklasipikar sa kalidad sa hangin nga “hazardous” ang lebel nga molapas sa 300.

“School principals are authorised to take immediate action in urgent situations. They do not have to wait until conditions worsen or spend too long consulting with other authorities,” matod ni Gogot.

Gipakita sa datos sa Forestry Ministry nga mokabat sa 200,000 hectares nga kayutaan ang nasunog sa unang pito ka bulan sa tuig, ug hapit midoble ang gidak-on sa nasunog nga kayutaan niadtong Hulyo lamang.

Nasunog sa mga sunog ang mokabat sa 73,310 hectares nga kayutaan sa unom ka prayoridad nga probinsya, sumala sa datos sa Forestry Ministry.

-Ato Ni Bai