261 Ka Langyaw Gikan sa 23 Ka Nasod Nawala sa Baha sa Himalayas

Miingon ang China niadtong Domingo nga 261 ka langyaw gikan sa 23 ka nasod ang nawala sa bahin sa Tibet sa border crossing uban sa Nepal human sa pagdahili sa lapok nga miigo sa rehiyon sa Himalayas, samtang misaka na ngadto sa 16 ang namatay sa Tibet.

Miingon ang mga opisyal sa Tibet Autonomous Region sa China atol sa press conference nga pinakadaghan sa mga nawalang langyaw ang gikan sa Nepal nga 104, samtang wala usab makit-i ang 49 ka Indian, 33 ka Latvian, 18 ka American, ug 15 ka British. Matod nila, gipahibalo na sa mga awtoridad sa Beijing ang mga embahada ug representante sa maong mga nasod.

Kini ang unang higayon nga gipagawas sa China ang mga nasod nga gigikanan sa mga nawalang langyaw sukad nahugno ang usa ka glacier niadtong Miyerkules, nga maoy hinungdan sa kusog nga pag-agos sa yelo, bato, lapok, ug uban pang debris ngadto sa mga suba sa Himalayas.

Miingon ang mga awtoridad nga 16 ka tawo ang namatay sa Gyirong County hangtod Sabado sa gabii ug 546 ang nawala.

Sa Nepal, miingon ang disaster authority nga labing menos 675 ka tawo ang namatay sa ilang bahin sa utlanan, 2,498 ang nawala, ug 7,514 ang naluwas.

Gisultihan sa local police ang Reuters nga namalhin ngadto sa mas taas nga lugar ang mga residente ug rescue worker human misaka ang lebel sa tubig sa duol nga Trishuli River sulod sa milabay nga pipila ka oras, nga nagpakita sa hulga sa dugang nga pagbaha bisan nagpadayon ang rescue operations.

CHINA GILAMBIGIT ANG KATALAGMAN SA GLOBAL WARMING

Ang katalagman “caused by glacier instability under the long-term effects of global warming”, matod sa Chinese state broadcaster nga CCTV niadtong Domingo, nga nag-ingon nga kini usa ka “new and prominent feature of cryosphere disasters” sa Tibetan plateau.

Miabot og unom hangtod pito ka minuto ang pagdahili sa lapok gikan sa bahin sa Nepal sa Gyirong border crossing, matod sa CCTV, nga mikutlo sa findings sa mga Chinese scientist.

Makita sa surveillance footage gikan sa border crossing ang kusog nga tubig ug debris nga mitabon sa mga building samtang naningkamot sa pag-ikyas ang mga tawo.

Gisultihan ni China Foreign Minister Wang Yi ang iyang Nepalese counterpart atol sa ilang panag-istorya sa telepono niadtong Sabado nga ang pagdahili sa lapok mao ang ilang “most severe cross-border disaster” sa bag-ohay nga mga tuig, ug nga wala pa sukad sila makasinati og ingon niini kalisod ug kakomplikado sa rescue operations, matod sa CCTV.

Gipadala sa China ang kapin sa 2,100 ka emergency rescue worker ug gigahin ang labing menos 220 million yuan ($32.7 million) aron suportahan ang relief efforts. Naghatag usab kini sa Nepal og emergency cash aid, disaster relief supplies, satellite ug hydrological data, ug mga eksperto sa tunnel rescue, matod sa state broadcaster.

Nagtinabangay ang duha ka nasod sa pag-ila sa mga nawalang lumulupyo ug langyaw, ingon man sa pagpalig-on sa kooperasyon sa pagpugong ug pagpamenos sa epekto sa mga katalagman ug pagtubag sa climate change, matod sa CCTV.

Gibanabana sa Red Cross nga kapin sa 90,000 ka tawo ang posibleng naapektuhan sa katalagman. -Ato ni Bai