2026 PH Bar exams, gisugdan sa kapin 12,000 ka mikuha sa eksaminasyon

Gisugdan niadtong Domingo (Setyembre 6) ang 2026 Bar Examinations diin 12,029 sa 13,441 ka rehistradong aplikante ang mikuha sa eksaminasyon. Sumala sa datos nga gipagawas sa Supreme Court (SC) Public Information Office, mas daghan ang mga babaye sa mga nangandoy mahimong abogado nga mikuha sa eksaminasyon sa 15 ka testing center sa tibuok Pilipinas. Gipakita sa datos sa SC nga sa kinatibuk-ang mikuha sa unang adlaw, 6,773 ang babaye ug 5,256 ang lalaki. Gipakita usab sa opisyal nga datos sa SC ang dakong kalainan sa edad sa mga law graduate nga gustong mahimong abogado: 24 anyos ang labing batan-on nga mikuha sa eksaminasyon karong tuiga, samtang 84 anyos ang labing tigulang.

Gipahibalo usab sa High Tribunal nga gihatagan og tabang sa mga lugar sa eksaminasyon ang 304 ka persons with disabilities (PWDs) ug 285 ka senior citizen aron masiguro nga matubag ang ilang mga panginahanglan atol sa eksaminasyon. Gipangulohan ni 2026 Bar Chairperson ug Supreme Court Associate Justice Samuel Gaerlan ang pagdumala sa digital nga Bar examinations, samtang ang San Beda College Alabang maoy national headquarters. Sa unang adlaw sa Bar exams, gikuhaan og eksaminasyon ang mga gustong mahimong abogado sa Political and Public International Law ug Commercial and Taxation Laws. Padayon ang tulo ka adlaw nga Bar exam sa Miyerkules (Setyembre 9) ug matapos sa Domingo (Setyembre 13). -Ato ni Bai