1,500 Filipino Seafarers Mibalibad sa Paglayag Tungod sa Risgo sa Seguridad

Miingon ang Department of Migrant Workers (DMW) niadtong Martes nga mokabat sa 1,500 ka Filipino seafarers ang migamit sa ilang katungod sa pagbalibad sa paglayag sulod sa miaging tulo ka tuig tungod sa mga risgo sa seguridad sa kadagatan.

Sa media interview atol sa pagbukas sa duha ka adlaw nga Philippine Maritime Convention sa The Manila Hotel, miingon si DMW Secretary Hans Leo Cacdac nga gipatuman sa gobyerno ang katungod sa mga seafarer nga mobalibad sa deployment ngadto sa mga lugar diin mahimong mameligro ang ilang kaluwasan, ilabi na taliwala sa nagpadayong mga pag-atake ug panagbangi sa pipila ka bahin sa Middle East ug Black Sea.

“As it stands, in the last three years, around 1,500 Filipino seafarers have exercised their right to refuse sailing. Some of them, in fact, Filipino captains have stood firm for the protection of their seafarers,” matod ni Cacdac.

Karong tuiga lamang, matod niya, mokabat sa 500 ka seafarers ang migamit niini nga katungod.

Matod ni Cacdac, ang mga seafarer nga mobalibad sa paglayag adunay katungod sa repatriation ug duha ka bulan nga compensation, samtang ang mga barko nga mobalik sa mga lugar nga taas og risgo kinahanglan moagi sa security assessment ug adunay tukmang mga lakang sa kaluwasan.

Miingon siya nga gisiguro usab sa gobyerno sa Pilipinas nga dili diskriminahon ang mga seafarer nga migamit niini nga katungod kon gusto nilang mobalik sa paglayag.

Matod ni Cacdac, nagpagawas ang DMW og mga pahimangno alang sa Filipino seafarers nga likayan ang Strait of Hormuz tungod sa dili lig-on nga kahimtang sa seguridad didto.

Miingon usab siya nga giimbestigahan sa gobyerno ang mga report bahin sa Filipino seafarers nga sakay sa mga barko nga posibleng misulod sa mga lugar nga gidid-an.

“We’re investigating the current round of attacks and will impose the necessary measures if we find that there are violations of the UN (United Nations) rules,” matod ni Cacdac.

Matod niya, giisip sa gobyerno ang bisan unsang pag-atake sa mga barko isip hulga sa mga seafarer, bisan unsa pa ang matang o kadak-on sa pag-atake.

Lig-on nga maritime systems

Samtang, gipasiugda ni Cacdac ang panginahanglan nga palig-onon ang maritime systems sa nasud aron masiguro ang mas maayong pagpanalipod sa Filipino seafarers.

“Our aspiration is clear: To strengthen a Philippine maritime system where the seafarer is protected, competent, respected, and prepared for the future,” matod niya.

Gipasabot niya nga ang epektibong pagpatuman sa Magna Carta of Filipino Seafarers kinahanglan suportahan sa lig-on nga maritime regulation, ethical recruitment, dekalidad nga edukasyon ug training, labor justice, responsive services, ug international cooperation.

Nanawagan usab siya og mas hugot nga kooperasyon tali sa gobyerno, labor, industriya, academe, ug international partners samtang nag-usab ang global maritime industry.

“Let us ensure that whatever direction the maritime industry takes, the Filipino seafarer remains at the center of our journey,” matod ni Cacdac.

Tumong sa Philippine Maritime Convention 2026, nga giorganisar sa DMW kauban ang Maritime Industry Authority, Associated Marine Officers’ and Seamen’s Union of the Philippines, ug Joint Manning Group, nga himuong konkretong mga commitment ang mga panaghisgot bahin sa maritime policies ug palig-onon ang kooperasyon tali sa gobyerno, industriya, ug labor alang sa kaayohan sa Filipino seafarers. -Ato ni Bai