14 ka suspek sa migrant smuggling gihusay sa France

Gisugdan sa Paris niadtong Martes ang paghukom sa 14 ka lalaki nga giakusahan og migrant smuggling kalabot sa pagkalumos sa kapin 30 ka tawo sa English Channel lima ka tuig na ang milabay, nga giisip nga labing grabeng trahedya nga nalambigit ang mga migrante sa maong dagat tali sa France ug Britain.

Namatay ang mga migrante human nahubsan og hangin ang ilang gisakyang overloaded nga gamayng rubber boat samtang misulay sila sa peligrosong pagtabok sa usa sa pinakabusy nga agianan sa mga barko sa kalibotan.

Giingong mga Afghan ug Iraqi-Kurdish smuggling network ang nag-organisar sa pagbiyahe sa mga migrante paingon sa Britain gikan sa mga kampo duol sa Grande-Synthe ug Calais sa northern France, sumala sa mga imbestigador. Nag-atubang ang mga akusado og mga kaso lakip ang involuntary manslaughter, pagtabang sa illegal immigration isip kabahin sa organisadong grupo, ug criminal conspiracy.

Nakapahibalo ang usa ka French fishing vessel sa emergency services human makakita og mga lawas nga naglutaw sa dagat duol sa Calais niadtong Nobyembre 2021, sumala sa court referral order. Nakuha ang mga lawas sa 27 ka biktima, samtang labing menos upat pa ang wala gayod makit-i. Duha lamang ka lalaki ang nakaluwas.

Kadaghanan sa mga biktima mga Iraqi Kurd, apan aduna usab mga Afghan, Ethiopian, usa ka Egyptian, usa ka Somali, usa ka Iranian Kurd, ug usa ka Vietnamese. Ang labing bata nga nailhang biktima usa ka 7-anyos nga batang babaye.

Gipuno ang mga migrante sa usa ka nipis ug dili sertipikadong rubber boat nga dili angay gamiton sa lawom nga dagat ug kulang usab og life jackets, sumala sa dokumento sa korte. Nakahinapos ang mga eksperto nga “no chance” ang mga sakay niini nga epektibong makatubag kon adunay emerhensiya sa dagat.

Lakip sa mga akusado sa involuntary manslaughter ang giingong mga organizer, transporter, ug logistics coordinator nga konektado sa mga smuggling group. Matod sa mga prosecutor, nakatampo ang ilang mga lihok sa mga kahimtang nga misangpot sa trahedya bisan pa og ang pipila kanila wala didto sa dihang milarga ang sakayan.

Duha sa mga akusado ang wala pa madakpi sa French authorities ug husayon bisan wala sila sa korte.

Gigamit sa mga imbestigador isip ebidensya ang mobile-phone data, na-intercept nga mga komunikasyon, surveillance operations, ug mga testimonya gikan sa mga nakaluwas ug mga paryente sa mga biktima.

Nakaplagan sa usa ka British inquiry nga malikayan unta ang mga kamatayon. Nakahinapos kini nga wala motubag ang usa ka French naval vessel sa panawagan alang sa tabang gikan sa British coastguard, nga nakahimo usab og “a number of flawed decisions,” lakip ang sayong paghunong sa pagpangita sa mga survivor.

Mobiyahe gikan sa Erbil sa Iraqi Kurdistan ang mga pamilya sa pipila ka biktima aron motambong sa bahin sa trial, matod sa ilang mga abogado.

“Justice must hold to account everyone who played a role in this tragedy,” matod sa pahayag.

Gilaum nga molungtad ang trial hangtod sa Setyembre 30.

-Ato Ni Bai