11 patay sa pagpamusil sa party sa South Africa posibleng lalis sa gang

Napatay ang labing menos 11 ka tawo ug nasamdan ang tulo human mipabuto ang tulo ka armadong lalaki ngadto sa mga bisita sa usa ka house party sa township sa habagatang bahin sa siyudad sa Durban niadtong Martes sa gabii, nga posibleng may kalabotan sa gang sumala sa kapolisan.

Usa ka babaye nga gituohang mabdos ug 13 ka lalaki ang apil sa mga mitambong sa party sa township sa KwaMakhutha sa lalawigan sa KwaZulu-Natal, matod sa kapolisan niadtong Miyerkules sa usa ka pahayag sa X.

“Ten victims, including the woman, died at the scene and four were taken to hospital, where one of them succumbed to gunshot injuries,” dugang nila sa usa ka pahayag.

Wala pa mahibaloi ang motibo sa pag-atake, apan matod sa kapolisan, “a feud between rival groupings cannot be ruled out”. Gilunsad sa kapolisan ang pagpangita sa tulo ka suspek.

Ang pipila sa mga biktima naa sa radar sa crime intelligence may kalabotan sa mga ilegal nga kalihokan, matod sa kapolisan, apan wala sila maghatag og dugang nga detalye.

Ang South Africa adunay usa sa pinakataas nga murder rates sa kalibotan, nga mokabat sa mga 60 ka tawo ang mapatay matag adlaw.

Nagpabiling dakong kabalaka sa mga botante ang bayolenteng krimen samtang nagkaduol ang municipal elections sa Nobyembre. -Ato ni Bai