‘Habagat’, mga Bagyo Mikalas og Walo ka Kinabuhi, Hapit 486,000 Naapektuhan sa PH

Namatay ang walo ka tawo samtang usa ang gikatahong nawala tungod sa gikusgang southwest monsoon (habagat), uban sa mga bagyong Luis ug Maymay, nga padayong nakaapekto sa pipila ka bahin sa nasod, sumala sa pinakabag-ong report sa gobyerno.

Miingon ang National Disaster Risk Reduction and Management Council (NDRRMC) nga ang mga namatay, nga tanan padayon pang gi-validate, naglakip sa duha sa Rizal tungod sa pagkatagak sa mga bato, duha sa Batangas tungod sa pagkalumos ug pagkakuryente, duha sa Benguet tungod sa pagdahili sa yuta, ug duha sa La Union tungod sa pagkakuryente ug pagkalumos.

Gireport usab sa ahensya nga pito ka tawo ang naangol sa Benguet tungod sa pagdahili sa yuta ug aksidente sa sakyanan. Usa ka tawo sa Batangas ang gikatahong nawala.

Naapektuhan hangtod alas 6 sa gabii niadtong Domingo ang mga 124,000 ka pamilya o 486,000 ka tawo sa Regions I (Ilocos), II (Cagayan), III (Central Luzon), Calabarzon, Mimaropa, Bicol, VI (Western Visayas), IX (Zamboanga Peninsula), ug Cordillera Administrative Region (CAR).

Gireport ang pagbaha sa Regions I, III, Mimaropa, CAR ug Calabarzon, samtang adunay mga pagdahili sa yuta nga gireport sa Regions I, CAR ug Calabarzon.

Gireport sa NDRRMC nga 119 ka evacuation centers ang aktibong gigamit, diin 2,500 ka pamilya o 8,300 ka tawo ang kasamtangang nagpuyo.

Nadaot ang kinatibuk-ang 170 ka balay, lakip ang 13 nga hingpit nga naguba ug 157 nga adunay partial nga kadaot.

Gibanabana sa PHP105.5 million ang kadaot sa imprastraktura, samtang miabot sa PHP3.5 million ang kadaot sa agrikultura.

Nakahatag ang mga ahensya sa gobyerno, local government units ug ubang partners og PHP13.93 million nga kantidad sa tabang ngadto sa mga naapektuhang pamilya.

Gimandoan ni President Ferdinand R. Marcos Jr. ang mga ahensya sa gobyerno nga magpabiling naka-heightened alert taliwala sa kusog nga pag-ulan ug pagbaha sa Metro Manila ug pipila ka bahin sa Luzon.

-Ato ni Bai