Kumusta Ka Na, Pilipinas?
“Bayang magiliw, Perlas ng Silanganan…”

“Bayang magiliw, Perlas ng Silanganan…”

Kumusta na ka, Pilipinas?

Mahigugmaon ka pa ba, o nalumos na sa kasubo, pagkawala sa pagsalig, ug kawad-on sa paglaom?

Ang perlas ba nagdan-ag pa,

o natabonan na sa lapok sa korapsyon, taya sa mga bakak,

ug hugaw sa inhustisya?

Nagbangotan ang kabukiran nga gikaupaw sa kahakog.

Naghilak ang mga suba nga gihiloan sa pagpabaya.

Naglisod og ginhawa ang hangin tungod sa aso sa walay pugong nga mga negosyo.

Gibahaan na ang mga lungsod tungod sa mga hakog ug walay pagkakontento.

Ug ang dagat—ang atong dagat—hinay-hinay nang gikawat sa mga langyaw

samtang puliki kita sa panaglalis ug pagkabahinbahin,

ug ang uban nagbudhi pa kanimo.

Kumusta ka na, Pilipinas?

Nasod sa mga kugihan,

apan napugos sa kakabos ang mga adunay abilidad, kakugi, ug kaalam

nga mangita og panginabuhi sa laing dapit aron adunay makaon ang ilang pamilya.

Tungod kay ang kaugalingong nasod dili makahatag og igo nga panginabuhi.

Kumusta ang mga mamumuo nga kulang ang sweldo apan sobra ang sakripisyo?

Kumusta ang mga mag-uuma nga walay maani sa kaugalingong yuta?

Kumusta ang mga mangingisda nga hinay-hinay nang mawad-an sa ilang dagat?

Kumusta ang mga gipatay ug mga nabiyaan nga hangtod karon gihikawan sa hustisya?

Kumusta ang mga batan-on nga nalumos sa sayop nga mga ehemplo

ug sa gubot nga sistema sa edukasyon?

Kumusta na ang mga naglisod tungod sa kamahal sa mga palaliton, walay makuhang tambal,

ug nag-antos sa kinabuhi tungod sa mga daotang binuhatan sa mga anaa sa gahum?

Kumusta na ang mga balik-balik nga gilimbongan sa ilang gipiling mga alagad

nga human sa ilang mga binuang mosinggit pa og “Para sa bayan!”?

Ug kumusta kita?

Nganong daw naanad na kita

sa balitang adunay nangawat,

adunay gipatay,

adunay namakak,

adunay nag-abuso sa gahum alang sa kaugalingong interes?

Kita nga dali masuko apan dali usab makalimot.

Kita nga gikapoy na sa korapsyon

apan mobotar gihapon sa mga pabida ug hakog alang sa kaugalingon, baylo sa ayuda ug kuwarta.

Kita nga gikapoy na sa mga pasundayag

apan magpabuta-bungol gihapon kon atong kaalyado ang nagbuhat.

Kita nga kahibalo mag-ampo apan mahadlok mobarog sa atong baroganan.

Kita nga nangayo og kausaban apan dili gustong magsugod sa kaugalingon.

Kumusta ka na, Pilipinas?

Gikapoy.

Naguba.

Gilimbongan.

Gipahimuslan.

Daw balik-balik nga gibaligya ug gibudhian.

Bisan pa niana, Pilipinas… ilawom sa mga pagbangotan, aduna gihapoy pitik sa paglaom, aduna gihapoy kalayo sa kasingkasing.

Wala ka makulangi sa abilidad, kaalam, ug kinaiyanhong bahandi. Aduna gihapoy mga Pilipino nga maayo, nag-una sa nasod, adunay kaulaw, kahibalo makigbisog, mahigugma, moalagad, ug adunay kahadlok sa Diyos.

Busa, Pilipinas kong mahal, Lupang hinirang… Modangop kita sa Diyos

Aron ang Kamatuoran mabutyag

Ang Hustisya maoy mopatigbabaw

Ang Kalinaw maoy maghari

Ug ang Kadaotan mapukan.

Dili kita mosuko o kapuyon,

Mata, mobangon, makigbisog, ug mag-ampo

Kay adunay Diyos nga puno sa kalooy ug grasya.

Apan anaa sa Diyos ang kalooy,

Anaa sa tawo ang buhat.

Kumusta ka na, Pilipinas?

Ikaw ang angay pangutan-on og kumusta!

-Bishop Jun sa Balanga

Ang Most Reverend Bishop Rufino “Jun” Sescon, Jr., O.P., mao ang ikalimang Roman Catholic Bishop of Balanga sa Bataan. Gipulihan ni Bishop Sescon si Bishop Ruperto Santos niadtong 2024 human gitudlo si Bishop Santos isip Bishop of Antipolo.

Sa wala pa siya ma-assign isip Bishop of Balanga, si Bishop Sescon mao ang parish priest sa Quiapo Church gikan 2022 hangtod 2024. Sa wala pa ang Quiapo, siya ang chaplain sa Greenbelt Chapel gikan 2005 hangtod 2022. Gi-ordain siya isip bishop niadtong Pebrero 25, 2025.

Disclaimer: Ang mga opinyon nga gipahayag sa tagsulat iya lamang ug wala sa bisan unsang paagi nagrepresentar sa Ato ni Bai.