VAT sa kuryente sa mga panimalay, gustong tangtangon ni Sen. Bam Aquino

Giawhag ni Senator Bam Aquino ang gobyerno nga ikonsiderar ang pagtangtang sa 12 percent value-added tax (VAT) sa kuryente sa mga panimalay aron makatabang sa pagpaubos sa bayranan sa kuryente sa mga pamilyang Pilipino.

Miingon si Aquino nga ang pagtangtang sa VAT sa kuryente sa mga panimalay mahimong makahatag og mas dakong kahupayan sa mga konsumidor, ilabina kon ubanan kini sa mga paningkamot nga tangtangon ang system loss charges, nga naglangkob sa mga 5 percent ngadto sa 6 percent sa bayranan sa kuryente.

“Kung tatanggalin po iyong VAT sa kuryente ng mga residential – hindi po mga negosyo, mga factory (If we remove VAT from residential electricity – not from businesses and factories) but just residential – this could mean a bigger drop in the electricity bill of our citizens,” matod ni Aquino atol sa bag-ohay nga Development Budget Coordination Committee (DBCC) briefing, sumala sa usa ka pahayag niadtong Miyerkules.

Nagpasaka si Aquino sa Senate Bill No. 266, nga nagtumong nga dili na pabayron og VAT ang pagbaligya sa kuryente sa mga generation, transmission ug distribution companies, ingon man sa mga electric cooperative.

Tinguha usab sa maong lakang nga dili na pabayron og VAT ang mga serbisyo sa franchise grantees sa electric utilities.

Miingon si Aquino nga ang pagtangtang sa buhis makatabang sa pagpaubos sa presyo sa kuryente pinaagi sa pagtangtang sa VAT nga gipas-an sa mga konsumidor.

Gawas sa gisugyot nga pagtangtang sa VAT sa kuryente sa mga panimalay, nagpasaka usab si Aquino sa Senate Bill No. 2047, nga nagtumong sa pagpaubos sa VAT rate gikan sa 12 percent ngadto sa 10 percent sa mga produkto ug serbisyo, lakip ang petroleum products.

Nagpasaka usab si Aquino sa Resolution No. 375 nga nanawagan og legislative inquiry sa bag-ohay nga pagsaka sa singil sa kuryente sa Manila Electric Company (Meralco), ilabina kon nganong ang mga konsumidor nga anaa sa middle class maoy gipas-an sa subsidyo sa kuryente alang sa mga panimalay nga ubos og kita, lakip ang pagpondo sa lifeline rate subsidy ug uban pang gimando nga diskwento sa kuryente.

Gitinguha ni Aquino ang pormal nga imbestigasyon sa “cross-subsidy” system, nga iyang gihulagway nga mekanismo nga makita sa binuwan nga bayranan sa kuryente diin ang mga panimalay nga dili benepisyaryo maoy nagbayad sa gasto sa mga diskwento nga gihatag sa mga kabus nga sektor ug senior citizens.

Sa pagkakaron, miresulta ang maong sistema sa dugang nga PHP 20 ngadto sa PHP 100 nga bayranan matag bulan alang sa kasagarang pamilya, matod ni Aquino.

Miingon siya nga bisan nagpabiling nasudnong prayoridad ang pagtabang sa labing kabus, ang gobyerno pinaagi sa national budget ang angay mopas-an sa gasto imbis nga ipasa kini ngadto sa bayranan sa kuryente sa ubang mga Pilipino nga naglisod usab.

-Ato Ni Bai