Supreme Court: Depositor Dili Obligadong Mobalik sa Kuwartang Sayop nga Gi-credit sa Bangko

Miingon ang Supreme Court niadtong Lunes nga dili mapugos ang usa ka depositor nga ibalik ang kuwarta nga sayop nga gi-credit sa bangko sa wala pa ang aktuwal nga clearing sa tseke nga naglangkob sa maong kantidad.

Gipagawas sa taas nga hukmanan ang maong pahayag human gisalikway sa Third Division niini ang petisyon sa BDO Unibank, Inc. nga nagtinguha nga ipabalik ang kuwarta nga nakuha na sa depositor nga wala masayod nga adunay problema, pinasikad sa unjust enrichment, tungod kay ang pagkawala sa kuwarta resulta sa grabeng pagpabaya sa bangko.

Gipasiugda sa korte nga “banking is a business imbued with public interest and banks are required to exercise the highest degree of diligence.”

“Paying out funds from a deposited check before proper clearance and disregarding established banking procedures fall below this standard,” dugang niini.

Niadtong Septiyembre 17, 2003, nagdeposito si “C” og regional check nga nagkantidad og PHP151,200 gikan sa Albay branch sa Land Bank of the Philippines ngadto sa iyang savings account sa BDO Lucena City branch.

Sayop nga gi-validate sa teller sa BDO ang tseke isip local imbis nga regional, hinungdan nga na-credit ang kantidad human lamang sa tulo ka banking days imbis sa gikinahanglang pito ka adlaw.

Mikuha dayon si Barcellano og PHP76,000 niadtong Septiyembre 23, 2003. Wala madugay, nakadawat ang BDO og stop payment order sa tseke ug gipangayo nga ibalik niya ang kuwarta.

Wala ibalik ni Barcellano ang kantidad ngadto sa BDO, nga sa ulahi midumili sa pagpagawas sa nahibiling balanse ug mipasaka og criminal complaint alang sa estafa.

Giabswelto sa Regional Trial Court (RTC) si Barcellano ug mihukom nga ang sayong pagkuha sa kuwarta resulta sa kaugalingong pagpabaya sa BDO. Gipaboran sa Court of Appeals ang maong hukom.

Sa atubangan sa Supreme Court, gihangyo sa BDO nga repasuhon ang civil aspect sa kaso, nga nangatarongan nga bisan giabswelto si Barcellano, kinahanglan gihapon siyang obligahong ibalik ang kuwarta. Matod sa BDO, ang iyang pagdumili sa pagbalik niini usa ka unjust enrichment.

Nangatarongan ang bangko nga tungod kay napagawas niini ang kuwarta tungod sa sayop sa pagproseso sa tseke, kinahanglan kining ibalik ni Barcellano ubos sa prinsipyo sa solutio indebiti, nga nagkinahanglan sa pagbayad balik sa kuwarta nga nadawat tungod sa sayop.

Mahitabo ang unjust enrichment kung ang usa ka tawo magpabilin nga nakabenepisyo nga walay balidong hinungdan ug adunay laing nahasol o nawad-an, o magpabilin nga naghupot og kuwarta o kabtangan nga supak sa mga prinsipyo sa hustisya, pagkapatas, ug maayong konsensya.

Motumaw ang obligasyon sa pagbayad balik kung ang bayad nahimo tungod sa sayop bisan walay obligasyon nga mobayad. Kinahanglan mapamatud-an sa nangayo sa pagbayad balik nga nahibalo ang tawo nga nakadawat ug nagpabilin nga naghupot sa benepisyo nga dili unta para kaniya.

Nakaplagan sa Supreme Court nga napakyas ang BDO sa pagpamatuod niini.

Wala ipasabot sa bangko nganong adunay stop payment order sa tseke o mapamatud-i nga nahibalo si Barcellano nga dili kini bayran. Hinuon, gipakita sa ebidensya nga gikuha niya ang kuwarta nga wala masayod nga adunay problema human ang BDO mismo maoy naghimo niini nga magamit sa iyang account.

Dugang nga mihukom ang Supreme Court nga ang kaugalingong grabeng pagpabaya sa BDO maoy hinungdan sa pagkawala niini.

“It found that the bank credited the check before it had properly cleared it, incorrectly treated a regional check as a local check and failed to detect the error until after receiving the stop payment order. These lapses showed a failure to observe basic safeguards meant to protect the bank from the risks of invalid checks,” matod niini.

-Ato Ni Bai