Senator Villar, nagduso og tax credits sa mga negosyo alang sa senior ug PWD discounts

Nagduso si Senator Mark Villar og usa ka balaodnon nga magtugot sa mga negosyo nga makakuha og tax credits alang sa mandatory discounts nga ilang gihatag sa mga senior citizen ug persons with disabilities (PWDs).

Matod ni Villar, tumong sa maong sugyot nga mapagaan ang pinansiyal nga palas-anon sa mga negosyo samtang masiguro nga padayong makadawat sa ilang mga benepisyo ang mga kwalipikadong senior citizen ug PWD.

Ang Senate Bill No. 2494, nga gitawag og “Tax Credit for Senior Citizens and Persons with Disability Discount Act,” nagtumong nga usbon ang Expanded Senior Citizens Act of 2010 ug ang Magna Carta for Persons with Disability.

Gipasiugda ni Villar nga dili angay nga ang mga negosyo, ilabina ang micro, small, and medium enterprises (MSMEs), maoy moako sa tibuok gasto sa pagpatuman sa mga diskwento nga gimando sa balaod.

“Ang pagbibigay ng diskwento sa ating mga senior citizen at persons with disabilities ay mahalagang bahagi ng ating social protection programs. Ngunit hindi dapat iasa lamang sa mga negosyo ang buong bigat ng pagpapatupad ng mga benepisyong ito. Kailangan nating magkaroon ng mas patas na sistema na nangangalaga sa ating mga benepisyaryo habang tinutulungan din ang ating mga negosyo, lalo na ang mga MSME, na manatiling matatag at makapagpatuloy sa kanilang operasyon,” matod ni Villar.

Ubos sa maong balaodnon, mahimong gamiton sa mga negosyo ang eksaktong kantidad sa mga kwalipikadong diskwento isip tax credits nga direktang ibawas sa ilang bayranang national internal revenue taxes. Kini ang mopuli sa kasamtangang sistema diin ang mga diskwento giisip lamang nga tax deductions.

Gitugotan usab sa balaodnon nga magamit sa mosunod nga mga taxable year ang wala pa magamit nga tax credits gikan sa mga diskwento sa senior citizen, apan dili gihapon tugotan ang refund o pagbalhin niini ngadto sa uban. Samtang niini, magpabilin ang kasamtangang tax deduction system alang sa labing menos 5% nga diskwento sa kwalipikadong binuwan nga konsumo sa tubig ug kuryente sa mga senior citizen.

Gipasiugda ni Villar nga ang maong sugyot nagtumong sa pagbalanse sa pagpanalipod sa kaayohan sa mga senior citizen ug PWD ug sa pagtabang nga magpabiling lig-on sa pinansiya ang mga lokal nga negosyo.

“Ang layunin natin ay matiyak na patuloy na matatanggap ng ating mga senior citizen at PWDs ang mga benepisyong nararapat sa kanila, habang binibigyan din natin ng mas patas na sistema ang mga negosyong nagpapatupad ng mga diskwentong ito. Sa ganitong paraan, napangangalagaan natin ang kapakanan ng ating mga kababayan at napapatibay ang ating mga negosyo bilang katuwang sa pag-unlad ng bansa,” dugang niya.

-Ato ni Bai