Sen. Pangilinan Nangayo og Imbestigasyon sa Pag-ubos sa Presyo sa Baboy ug Manok

Nangayo si Senator Francis “Kiko” Pangilinan og imbestigasyon sa Senado bahin sa pag-ubos sa presyo sa baboy ug manok gikan sa mga mag-uuma ug pagtaas sa gasto sa pagpadako niini, nga naghulga sa pagpadayon sa ilang mga negosyo.

Si Pangilinan, nga chairperson sa Senate Committee on Agriculture, Food, and Agrarian Reform, misumite sa Proposed Senate Resolution No. 726 niadtong Oktubre 8 aron matino ang mga balaod nga makatabang sa pagpalig-on sa lokal nga produksyon, pagpanalipod sa panginabuhian sa mga tigpadako og baboy ug manok, ug pagsiguro sa lig-ong suplay sa karne ug ubang produkto gikan sa mga hayop.

Gisumite ang resolusyon pipila ka adlaw human gisuportahan sa senador ang panawagan sa mga tigpadako og baboy nga patas-an ang presyo sa ilang produkto ug hugtan ang pagkontrol sa pag-import og karne.

Gimando sa resolusyon nga susihon sa komite sa agrikultura sa Senado ang kahimtang sa industriya sa pagpadako og baboy ug manok, ilabina ang pag-ubos sa presyo sa mga buhing baboy ug broiler chicken bisan nagkataas ang presyo sa pagkaon sa hayop ug ubang gasto sa produksyon.

“Resolved by the Senate, as it is hereby resolved, to direct the Senate Committee on Agriculture, Food, and Agrarian Reform to conduct an inquiry, in aid of legislation, into the state of the Philippine livestock and poultry industries, with particular focus on the depressed farmgate prices of hogs and broiler chicken amid escalating feed and production costs,” sumala sa resolusyon.

Tumong usab sa maong lakang nga masiguro ang “the viability of local producers, safeguarding rural livelihoods, and securing affordable and sustainable food supply for Filipino consumers.”

Base sa mga taho sa Department of Agriculture (DA), miingon si Pangilinan nga miubos ngadto sa P120 hangtod P160 matag kilo ang farmgate price sa buhing baboy sa pipila ka lugar. Mas ubos kini sa P210 matag kilo nga minimum nga presyo nga gikasabutan sa DA ug mga grupo sa industriya sa baboy.

Mas ubos usab kini sa gibanabanang gasto sa produksyon nga P180 hangtod P190 matag kilo, nga misangpot sa gibanabanang P250 milyon nga adlaw-adlaw nga kapildihan sa mga tigpadako og baboy, sumala sa resolusyon.

Nasinati usab sa mga tigpadako og manok ang susamang problema. Matod ni Pangilinan, adunay mga taho nga miubos ngadto sa P65 matag kilo ang farmgate price sa broiler chicken sa dagkong lugar nga nagprodyus og manok niadtong Abril 2026.

Samtang, wala mokunhod sa samang kapaspason ang presyo sa baboy sa mga merkado. Gipakita sa datos sa Philippine Statistics Authority nga ang kasagarang presyo sa preskong baboy nga adunay bukog miabot sa P295.58 matag kilo sa ikaduhang bahin sa Setyembre 2026, nga 9.6% nga mas ubos sa P327.03 matag kilo sa samang panahon sa miaging tuig.

Gipasidan-an sa resolusyon nga ang dugay nga pag-ubos sa farmgate prices ug pagtaas sa gasto sa produksyon mahimong mopugos sa mga tigpadako og baboy ug manok, ilabina ang gagmay nga mag-uuma ug mga nagpadako sa ilang kaugalingong panimalay, nga mokunhod sa produksyon o hingpit nga moundang sa negosyo.

“Continuously depressed farmgate prices alongside high production costs may force hog and poultry raisers, especially small and backyard raisers, to reduce production or exit the industry altogether, thereby deepening the country’s dependence on imports and undermining long-term food security,” sumala sa resolusyon.

Nakapunting ang mga gisugyot nga balaod ni Pangilinan sa pagpauswag ug pagmoderno sa agrikultura, kalamboan sa mga komunidad sa kabaryohan, pagpalig-on sa panginabuhian sa mga mag-uuma ug mangingisda, ug pagsiguro sa igo nga suplay sa pagkaon sa nasod. -Ato ni Bai