PSEi misaka samtang milig-on ang piso batok sa US dollar

Misaka ang Philippine Stock Exchange index (PSEi) niadtong Miyerkules tungod sa pagpamalit sa mga stock nga mibarato, samtang milig-on usab ang piso batok sa US dollar.

Misaka og 0.17% ngadto sa 6,116.53 points ang PSEi, samtang misaka og 0.04% ngadto sa 3,385.85 points ang mas halapad nga All Shares index.

Tulo sa mga sektor ang misaka: Services og 1.59%, Mining and Oil og 0.55%, ug Industrial og 0.05%.

Sa laing bahin, miubos ang Holding Firms og 1.29%, Property og 0.82%, ug Financials og 0.12%.

Miduol sa 940 milyon ka shares ang gidaghanon sa mga stock nga gibaligya, nga nagkantidad og ₱5.9 bilyon.

Mas daghan ang mga stock nga miubos kaysa misaka, 106 batok sa 88, samtang 55 ang walay kausaban.

“The local index closed slightly higher as trading remained cautious, with investors continuing to focus on selected index heavyweights. Market sentiment also improved as the Philippine peso showed some relief against the US dollar,” matod ni Luis Limlingan, head of sales sa Regina Capital Development Corporation.

Apan matod niya, “upside remained limited as investors maintained a selective approach amid prevailing economic uncertainties.”

Milig-on usab ang piso ug nagtapos sa ₱62.51 kada US dollar, gikan sa ₱62.62 niadtong Martes.

Nagsugod ang trading sa ₱62.50 kada US dollar, samtang naglihok ang exchange rate tali sa ₱62.43 ug ₱62.55. Ang average rate sa adlaw anaa sa ₱62.48.

Mikabat sa $1.68 bilyon ang gidaghanon sa foreign exchange transactions, mas taas sa $1.39 bilyon sa miaging adlaw. -Ato ni Bai