PSEi Misaka sa 5,700.99 Puntos Samtang Peso Mihuyang

Nakabawi ang Philippine Stock Exchange index (PSEi) sa kataposang bahin sa semana bisan mihuyang ang peso, tungod sa pagkunhod sa presyo sa krudo sa tibuok kalibotan ug pag-ubos sa yields sa US Treasury bonds, nga nakahatag og temporaryong kahupayan sa mga mamumuhunan sa lokal nga stock market.

Misaka og 1.61% ang PSEi ngadto sa 5,700.99 puntos, samtang misaka usab og 1.47% ang mas lapad nga All Shares index ngadto sa 3,191.85 puntos.

Sa usa ka market report, gipatin-aw ni Rizal Commercial Banking Corporation chief economist Michael Ricafort nga ang pagbawi sa stock market partly tungod sa pagkunhod sa presyo sa krudo sa tibuok kalibotan, pag-ubos sa yields sa US Treasury bonds gikan sa pinakataas nga lebel sulod sa 24 ka tuig nga naabot sayo ning semanaha, ug pahayag ni President Donald Trump nga dili moatake ang Estados Unidos sa Iran sa wala pa ang midterm elections sa Nobyembre 3.

Nagtapos usab ang tanang sektor sa stock market nga adunay pagtaas, nga gipangulohan sa Mining and Oil index nga misaka og 2.80%.

Gisundan kini sa Services nga misaka og 2.36%, Industrial sa 2.33%, Financials sa 1.50%, Property sa 0.79%, ug Holding Firms sa 0.61%.

Nagpabiling ubos ang gidaghanon sa mga gipamaligyang stock, diin 630.34 milyon ka shares nga nagkantidad og PHP7.8 bilyon ang nabaligya ug napalit. Mas daghan ang mga kompanyang misaka ang presyo sa ilang shares kaysa sa mga miubos, 120 batok sa 57, samtang 62 ang wala mausab ang presyo.

Bisan misaka ang stock market, mihuyang ang peso ug nagtapos sa semana sa 62.80 batok sa US dollar, gikan sa 62.9 nga closing rate niadtong Huwebes.

Nagsugod ang trading sa peso sa 62.75, nga mas huyang kumpara sa 62.65 sa miaging adlaw. Naglihok ang exchange rate tali sa 62.73 ug 62.90, nga adunay average nga 62.79 sa tibuok adlaw.

Mikunhod usab ang gidaghanon sa mga transaksyon sa foreign exchange ngadto sa USD1.39 bilyon gikan sa USD1.45 bilyon sa miaging trading session. Gibanabana ni Ricafort nga maglihok ang peso tali sa 62.75 ug 62.90 batok sa US dollar sa Lunes. -Ato ni Bai