Presyo sa stocks ug kantidad sa piso miubos tungod sa pagsaka sa presyo sa krudo

Miubos ang presyo sa mga stocks ug ang kantidad sa piso sa Pilipinas niadtong Huwebes tungod sa nagkadakong kabalaka sa mga mamumuhunan human misaka sa hapit USD104 matag baril ang presyo sa krudo sa pandaigdigang merkado. Tungod niini, nabali ang miaging pagsaka sa Philippine Stock Exchange index (PSEi).

Grabe ang pag-ubos sa lokal nga merkado sa stocks, diin mius-os og 2.2% ang PSEi ngadto sa 5,610.39 puntos, samtang miubos og 1.45% ang mas lapad nga All Shares index ngadto sa 3,145.55 puntos.

Ang sektor sa serbisyo ang nakasinati sa kinadak-ang pag-ubos nga 4.86%, gisundan sa Mining and Oil nga 3.43%; Financials, 1.43%; Property, 1.02%; Industrial, 0.09%; ug Holding Firms, 0.06%.

Miabot sa kapin 2 bilyon ka shares nga nagkantidad og PHP21.13 bilyon ang kinatibuk-ang gidaghanon sa mga stocks nga gibaligya ug gipalit.

Mas daghan ang mga stocks nga miubos ang presyo nga 112 kumpara sa 73 nga misaka, samtang 67 ang wala mausab ang presyo.

“The local index ended lower as selling pressure intensified amid rising crude oil prices, with oil nearing USD104 per barrel. Moreover, sentiment weakened as traffic through the Strait of Hormuz fell to a two-month low, raising concerns over potential supply disruptions,” matod ni Luis Limlingan, head of sales sa Regina Capital Development Corp.

“Investors remained cautious as elevated oil prices could further weigh on inflation and economic growth.”

Samtang, miubos usab ang kantidad sa piso ngadto sa PHP62.90 matag usa ka dolyar sa Amerika gikan sa PHP62.75 niadtong Miyerkules.

Sa pagsugod sa pagpamaligya, ang piso anaa sa PHP62.65 matag dolyar, ug naglihok ang kantidad niini tali sa PHP62.90 ug PHP62.65. Ang kasagarang kantidad niini sa tibuok adlaw anaa sa PHP62.76 matag dolyar.

Misaka usab ang kinatibuk-ang kantidad sa mga dolyar nga gibaligya ug gipalit ngadto sa USD1.45 bilyon gikan sa USD1.21 bilyon sa miaging adlaw.

-Ato ni Bai