Presyo sa stocks sa Asia miubos tungod sa dagkong utang nga gipangita sa mga kompanya sa AI

Miubos ang presyo sa mga stocks sa Asia niadtong Huwebes samtang nagkagrabe ang problema sa merkado sa mga bond sa gobyerno, human migawas ang mga taho nga pipila ka dagkong kompanya sa teknolohiya nangitag bilyon-bilyong dolyar nga utang, nga makigkompetensiya sa gobyerno alang sa limitadong pondo.

Midugang sa pressure sa mga bond sa gobyerno sa Estados Unidos ang bag-ong pagsaka sa presyo sa krudo. Apan nakatabang ang kusog nga pagpalit sa 10-year US Treasury bonds atol sa subasta sa miaging gabii aron moubos ang ilang interes gikan sa labing taas nga lebel sulod sa 24 ka tuig.

Samtang nakatabang sa pagpalig-on sa dolyar ang taas nga interes sa mga bond, miubos ang kantidad sa euro ngadto sa duol sa labing ubos nga lebel sulod sa 17 ka bulan tungod sa kabalaka sa kahimtang sa panalapi sa France, nga nakaapekto usab sa mga bond sa Italy ug Greece.

Tungod sa padayong pagsaka sa gasto sa pagpangutang, nag-amping ang mga mamumuhunan sa stocks. Miubos og 0.9% ang Nikkei index sa Japan ug 0.6% ang merkado sa South Korea, samtang mius-os og 0.1% ang MSCI index nga nagsubay sa mga stocks sa Asia-Pacific gawas sa Japan.

Sa Wall Street, halos walay kausaban ang S&P 500 ug Nasdaq futures. Sa Europe, misaka og 0.1% ang EUROSTOXX 50, DAX, ug FTSE futures human sa ilang pag-ubos niadtong Miyerkules.

Midugang ang The Wall Street Journal sa mga taho nga ang SpaceX, Broadcom, ug Oracle nangitag pondo aron makapalit og mga chip nga gamiton sa artificial intelligence (AI).

Nangitag $50 bilyon nga pondo ang Broadcom, samtang nagplano ang SpaceX nga mangutang og $30 bilyon pinaagi sa pagpagawas og investment-grade bonds ug dugang $10 bilyon pinaagi sa mga pautang aron makapalit og mga chip gikan sa Nvidia, nga usa sa dagkong tag-iya og shares sa SpaceX.

Tungod sa maong balita, misaka sa rekord nga lebel ang gasto sa insurance batok sa posibleng dili pagbayad sa utang sa SpaceX, samtang miubos ang presyo sa mga stocks ug bond niini.

Nagpasidaan si Nigel Green, CEO sa deVere Group, sa delikadong kahimtang diin ang Nvidia mismo ang naghatag og pondo sa mga kompanyang mopalit sa iyang mga produkto. Matod niya, mahimong mameligro ang mga mamumuhunan sa tibuok kalibotan kon dili makab-ot ang gilaom nga kita.

"The AI build out started on cash," matod ni Green. "It's increasingly running on credit, and credit changes the risk profile entirely."

"Debt has to be repaid on schedule, whether the revenues show up or not," dugang niya. "And this debt is landing in the bond funds and pension pots of savers right around the world.”

Mga bond sa gobyerno batok sa utang sa mga kompanya

Bisan pa niini, mahimong makabenepisyo ang mga kompanya nga naghimo og semiconductor ug memory chip tungod kay dakong bahin sa maong pondo ang gamiton sa pagpalit og kagamitan alang sa AI, nga posibleng makadugang sa ilang kita.

Niadtong Huwebes, gitagna sa Samsung Electronics nga mosaka og 783% ang operating profit niini sa ikatulong quarter ngadto sa 107.4 trilyon won ($80.17 bilyon), bisan pa nga miubos og 0.3% ang presyo sa iyang stocks.

Nahitabo ang pagdaghan sa mga utang sa mga kompanya samtang nag-atubang usab og dakong pressure ang merkado sa mga bond sa gobyerno tungod sa kabalaka sa inflation, nagkadakong kakulangan sa pondo sa mga badyet, ug pagsaka sa interes sa pagpangutang.

Gipakita sa mga rekord sa kataposang tigom sa Federal Reserve nga gipagawas niadtong Miyerkules nga "most" sa mga miyembro niini nagtuo nga posibleng adunay laing pagsaka sa interes sa dili pa matapos ang tuig, bisan pa nga bukas gihapon sila sa pagtan-aw sa kahimtang sa matag tigom.

Base sa mga presyo sa merkado, 19% lamang ang posibilidad nga mopataas pag-usab og interes ang Federal Reserve karong bulana, apan 80% ang posibilidad nga adunay pagsaka sa Disyembre.

"We expect a second Fed hike in December, though we see a strong chance the Fed ultimately concludes further tightening is unnecessary," matod sa mga tig-analisar sa Goldman Sachs sa usa ka taho.

Ang posibilidad nga temporaryong hunongon ang pagpataas sa interes nakatabang nga magpabilin sa 4.78% ang interes sa 2-year US Treasury bonds. Samtang, misaka ngadto sa 5.298% ang interes sa 10-year bonds human kini miabot sa 5.326% sa miaging gabii, ang labing taas nga lebel sulod sa 24 ka tuig.

Tungod sa problema sa merkado sa mga bond sa France, giila ni Bank of France Governor Emmanuel Moulin nga seryoso ang kahimtang sa ekonomiya sa nasud. Apan gipasaligan niya ang mga mamumuhunan nga dili kinahanglan mangayo og tabang ang France gikan sa European Central Bank.

Tungod niini, gipamaligya sa mga mamumuhunan ang ilang euro, nga miresulta sa pag-ubos sa kantidad niini ngadto sa $1.1198 human kini mius-os og 0.6% sa miaging gabii. Kon moubos pa kini sa bag-ohay nga lebel nga $1.1161, posible nga moabot kini sa $1.1065.

Ang dolyar ang labing nakabenepisyo sa pagkaluya sa euro, diin misaka ang dollar index ngadto sa 102.22, duol sa labing taas nga lebel sulod sa 18 ka bulan. Apan miubos kini og 0.1% batok sa Japanese yen ngadto sa 157.90, samtang ang yen napanalipdan sa posibilidad nga mangilabot ang gobyerno sa Japan sa merkado.

Sa merkado sa mga palaliton, misaka og 0.9% ang Brent crude futures ngadto sa $101.14 matag baril, samtang misaka og 0.8% ang US crude futures ngadto sa $89.02 matag baril.

Samtang, naapektuhan ang presyo sa bulawan tungod sa pagsaka sa interes sa mga bond, kay ang bulawan wala maghatag og interes. Miubos kini ngadto sa $4,105 matag onsa, duol sa labing ubos nga lebel sulod sa duha ka bulan.

-Ato ni Bai