Presyo sa pagkaon sa kalibotan, misaka sa labing taas nga lebel sukad 2022 — FAO

Misaka niadtong Agosto ang presyo sa pagkaon sa tibuok kalibotan ngadto sa labing taas nga lebel sukad sa ulahing bahin sa 2022, tungod sa dili maayong panahon ug pagkabalda sa suplay tungod sa gubat sa Black Sea nga nakapadugang sa kabalaka bahin sa suplay sa mga batakang pagkaon, matod sa Food and Agriculture Organization (FAO) sa United Nations niadtong Biyernes.

Nakabalda sa merkado sa mga produktong agrikultural ang grabeng kainit ug hulaw sa Europe, hulga sa grabeng El Niño, ug mga problema sa pamatigayon tungod sa mga gubat sa Ukraine ug Iran, nga nakapataas sa presyo sa mga lugas ngadto sa labing taas nga lebel sulod sa tulo ka tuig ug sa asukar ngadto sa labing taas nga lebel sulod sa usa ka tuig.

Ang FAO Food Price Index, nga nagsubay sa binulang kausaban sa presyo sa nagkalain-laing pagkaon nga gibaligya sa internasyonal nga merkado, miabot sa aberids nga 133.3 puntos niadtong Agosto, gikan sa giusab nga 130.8 puntos niadtong Hulyo.

Kini ang labing taas nga lebel sukad Nobyembre 2022, apan hapit 17% nga mas ubos gihapon kumpara sa rekord nga kinatas-an niadtong Marso 2022, human sa pagsugod sa hingpit nga pagsulong sa Russia sa Ukraine.

“August’s increase in global food prices is a warning that the risk premium is returning to food markets: climate shocks, geopolitical tensions and disrupted trade logistics are converging to tighten supply expectations,” matod ni FAO Chief Economist Maximo Torero sa usa ka pahayag.

Misaka niadtong Agosto ang sukdanan sa presyo sa FAO alang sa mga lugas, mantika nga gikan sa tanom, asukar, karne ug mga produktong gatas.

Naapektuhan sa grabeng panahon sa Europe ang gipaabot nga ani sa mais ug sugar beet, ingon man ang produksyon sa kahayupan, samtang ang gipaabot nga El Niño nakapadugang sa kabalaka bahin sa produksyon sa palm oil ug asukar sa Asia, matod sa FAO.

Nakapamenos sa pagpadala sa mga lugas gikan sa Russia ug Ukraine ang nagkagrabeng mga pag-atake sa Black Sea taliwala sa upat ug tunga ka tuig nilang gubat, samtang ang panagbangi tali sa US ug Iran nakapabug-at sa suplay sa abono alang sa mga pananom.

Sa mga kategoriya sa pagkaon, misaka og 2.2% kumpara sa miaging bulan ang FAO cereals price index ngadto sa labing taas nga lebel sukad Mayo 2024, samtang misaka og 0.6% ang vegetable oil index ngadto sa labing taas nga lebel sukad Hunyo 2022.

Misaka og 11.9% ang sukdanan sa presyo sa asukar ngadto sa labing taas nga lebel sukad Hunyo 2025, tungod sa ubos nga produksyon sa importanteng center-south region sa Brazil ug sa mga kabalaka sa panahon sa Europe ug Asia.

Sa laing report, gipaubos sa FAO og 3.4 milyon ka metric tons ang forecast niini sa global cereal production alang sa 2026 gikan sa miaging banabana niadtong Hulyo ngadto sa 2.980 bilyon ka tonelada. Kini karon 2.0% nga mas ubos kumpara sa 2025 ug maoy pinakadakong tinuig nga pagkunhod sukad 2018.

Bisan pa niini, ang gipaabot nga produksyon mao gihapon ang ikaduhang labing taas nga natala.

Gipaubos usab og 1.1% ngadto sa 947.2 milyon ka tonelada ang gipaabot nga stock sa mga lugas sa tibuok kalibotan sa pagtapos sa 2026/2027, nga gamay na lamang nga mas taas kumpara sa miaging panahon.

Matod sa FAO, ang gipaubos nga banabana sa stock sa coarse grains mas dako ang epekto kay sa gipataas nga banabana alang sa trigo, nga nagpakita sa gipaabot nga pagdaghan sa stock sa trigo sa Russia ug Ukraine tungod sa pagkabalda sa pagpadala niini. -Ato ni Bai