Presyo sa mga Dulaan sa US Misaka Tungod sa Tariffs ug Gubat sa Iran

Nag-atubang og dugang kalisod sa ilang budget ang mga konsumidor sa United States (US) karong umaabot nga holiday season tungod sa dungan nga epekto sa tariffs sa mga imported nga produkto ug taas nga gasto sa enerhiya.

Samtang hinayhinay nga misaka ang kinatibuk-ang inflation, mas paspas ang pagsaka sa presyo sa mga dulaan, nga misaka og 6.6% sulod sa miaging tuig, sumala sa pinakabag-ong US consumer inflation data.

Misaka usab ang presyo sa ubang mga produkto nga nagsalig sa mga kargamento gikan sa ubang nasod ug sa petrolyo alang sa ilang paghimo.

Nagpabiling apektado ang industriya sa dulaan sa nag-usab-usab nga tariff policies sa administrasyon ni President Donald Trump, tungod kay kadaghanan sa mga dulaan nga gibaligya sa US gihimo sa China. Dugang niini, kasagaran sa mga dulaan gihimo gikan sa plastik nga naggikan sa fossil fuels, busa posibleng nakaamot usab ang pagsaka sa presyo sa krudo tungod sa gubat sa Middle East sa mas mahal nga presyo nga makita sa mga konsumidor sa mga tindahan.

"Those dual issues appear to be showing up in pricing," matod ni David Silverman, senior director sa Fitch Ratings nga nagtutok sa mga kompanya sa retail ug consumer products. "The impact from the Iran conflict on commodity costs and shipping costs will certainly persist for the next several quarters."

Misaka usab ang presyo sa mga sinina ug sapatos niadtong Setyembre, sumala sa US Consumer Price Index report. Apan mas dako ang pagsaka sa presyo sa mga dulaan kumpara sa ubang mga produkto, samtang nagsugod na ang mga Amerikano sa pagplano sa ilang mga regalo alang sa holiday season. Misaka og 4.2% ang presyo sa mga dulaan gikan sa Agosto, human i-adjust ang datos base sa seasonal factors.

Human makabalik sa White House ug magpatuman og dagkong tariffs sa mga produkto gikan sa China, giila ni President Donald Trump niadtong Abril 2025 nga posibleng makapataas sa presyo sa mga palaliton ang iyang tariff policies. Niadtong panahona, nakadawat siya og mga pagsaway human mosugyot nga ang mga bata mahimong adunay "two dolls instead of 30 dolls."

Sukad niadto, dako ang pagkunhod sa iyang approval rating, ilabina sa mga isyu sa ekonomiya. Gipakita sa Reuters/Ipsos poll hangtod Oktubre 5 nga 21% lamang sa mga botante ang miuyon sa pagdumala ni Trump sa mga isyu sa gasto sa panginabuhi, samtang 67% ang wala mouyon.

Gipaubos na ang US tariffs sa mga produkto gikan sa China sukad sa unang 145% nga rate nga gipahamtang sa administrasyon ni Trump, nga gipaubos ngadto sa 30% niadtong Mayo 2025. Nakab-ot usab sa US ug China ang usa ka kasabotan sa ulahing bahin sa Setyembre aron pakunhoran ang tariffs sa tag-$30 billion nga kantidad sa mga produkto nga ilang gi-import ug gi-export.

Apan matod ni Jay Foreman, CEO sa Basic Fun, usa ka kompanya sa dulaan sa Florida nga naghimo sa Tonka trucks ug Care Bears, ang kasamtangang presyo nagpakita gihapon sa epekto sa mas taas nga tariffs kaniadto. Matod niya, gigamit sa industriya sa dulaan ang maong mga rate sa miaging tuig sa pagtakda sa presyo sa mga produktong gibaligya karong tingdagdag.

"Tariffs add a noticeable cost to toys and other goods," dugang ni Foreman. "Reducing them now will over time lower the price of toys as long as other global issues subside, like the various wars that are pushing up fuel and raw material costs."

Gipahayag ni Chief Financial Officer Paul Ruh sa Mattel MAT.O, ang kompanya nga naghimo sa Barbie, nga "seeing some moderate inflationary pressures associated with events in the Middle East," atol sa usa ka earnings call niadtong Agosto, human ireport nga ang mga gasto tungod sa tariffs nakaapekto sa ginansya sa kompanya. Matod usab ni Hasbro HAS.O Chief Financial Officer Gina Goetter niadtong Hulyo, nasagubang sa ilang kompanya ang "higher input costs."

Wala dayon makahatag og tubag ang duha ka kompanya sa mga hangyo alang sa komento bahin sa mga hinungdan nga nakaapekto sa ilang mga presyo. -Ato ni Bai