Presyo sa krudo misaka samtang milapas sa $100 kada baril ang Brent

Misaka pa ang presyo sa krudo niadtong Miyerkules, diin milapas sa $100 kada baril ang Brent crude samtang nagpadayon ang tensyon tali sa US ug Iran.

Misaka og 2.2% ang Brent crude ug milapas sa $100 kada baril alas 7:30 sa buntag GMT. Ang Brent maoy kasagarang basihan sa presyo sa krudo sa tibuok kalibotan.

Misaka usab og 1.5% ngadto sa $94.5 kada baril ang West Texas Intermediate (WTI).

Miingon niadtong Miyerkules ang Islamic Revolutionary Guard Corps (IRGC) sa Iran nga giatake sa naval forces niini ang duha ka US vessels ug walo ka oil tanker sa Persian Gulf. Giangkon niini nga grabeng nadaot ang mga barko tungod sa mga pag-atake.

Sa usa ka pahayag, miingon ang IRGC nga ang mga pag-atake “carried out in response to US aggression, including an attack on five Iranian oil tankers in the Persian Gulf.”

Wala hinganli sa IRGC ang US vessels ug mga oil tanker nga giingon nitong giatake, ug wala usab kini mohatag og detalye kon kanus-a nahitabo ang mga pag-atake.

Miingon usab ang IRGC nga giatake sa Iranian naval forces ang 10 pa ka barko nga “attempted to enter a restricted and unsafe area of the Strait of Hormuz,” ug giangkon nga gibuhat kini sa mga barko uban sa “encouragement and support of the US military.”

Mipirma ang US ug Iran og memorandum of understanding niadtong Hunyo pinaagi sa pagpataliwala sa Pakistan ug Qatar. Gilatid niini ang mga lakang aron matapos ang panagbangi, maablihan pag-usab ang Strait of Hormuz, ug matubag ang mga restriksyon sa ekonomiya.

Sukad niadto, nagbinayloay og akusasyon ang duha ka nasud nga wala gituman sa pikas ang ilang mga kasabotan ubos sa memorandum, samtang nagpadayon ang tensyon sa militar ug panaglalis bahin sa sanctions ug pag-agi sa mga barko sa Strait of Hormuz. -Ato ni Bai