PH Gov’t Nag-andam og Fuel Excise Tax Relief Tungod sa Pagsaka sa Presyo sa Krudo

Gitapos na sa Development Budget Coordination Committee (DBCC) ang proposal niini alang sa posibleng fuel excise tax relief samtang padayon nga nagsaka ang presyo sa petrolyo, matod sa Malacañang niadtong Huwebes.

Miingon si Palace Press Officer Claire Castro nga wala mahisguti ang maong isyu atol sa 11th Economy and Development Council meeting sa Malacañang niadtong Miyerkules, apan padayon kining gitimbang-timbang sa economic team.

“Nakausap po natin si (Budget) Secretary Kim de Leon at ito po ay kanilang e-evaluate at for finalization. Kapag na-finalize na po ay ibibigay po agad nila ang rekomendasyon sa Pangulo (We have spoken with Budget Secretary Kim de Leon, and they are currently evaluating and finalizing the matter. Once finalized, they will immediately submit the recommendation to the President),” matod ni Castro sa usa ka briefing sa Malacañang.

Gisugdan sa DBCC ang maong pagsusi human pormal nga gikumpirma sa Department of Energy (DOE) nga miabot sa USD99.41 kada baril ang usa ka bulan nga aberids nga presyo sa Dubai crude gikan Agosto 13 hangtod Setyembre 11, nga mas taas sa USD80 kada baril nga threshold ubos sa Republic Act 12316 alang sa posibleng pagsuspenso o pagpaubos sa fuel excise taxes.

Ubos sa RA 12316, mahimong suspindihon o paubson sa Presidente ang excise taxes sa pipila ka petroleum products, base sa rekomendasyon sa DBCC ug koordinasyon sa Energy Secretary, kon ang usa ka bulan nga aberids nga presyo sa Dubai crude moabot o molapas sa USD80 kada baril. Mahimong ipatuman ang maong tax relief hangtod sa tulo ka bulan matag higayon.

Gihimo ang maong pagsusi samtang laing dakong pagsaka sa presyo sa petrolyo ang gipatuman karong semanaha.

Gikan Setyembre 15 hangtod 21, misaka ang presyo sa gasolina og hangtod PHP5.70 kada litro, diesel og PHP4.31 kada litro, ug kerosene og PHP4.62 kada litro, sumala sa pinakabag-ong price adjustments nga gipahibalo sa mga kompanya sa petrolyo. Misunod kini sa laing pagsaka sa presyo sa miaging semana.

Gipasabot sa DOE nga ang padayong pagsaka sa presyo sa petrolyo sa nasod tungod sa pagsaka sa presyo sa krudo sa international market taliwala sa nagpadayong panagbangi ug pagkabalda sa suplay sa Middle East, lakip ang mga panghitabo nga nakaapekto sa pagbiyahe sa mga oil tanker agi sa Strait of Hormuz.

Niadtong Abril, gigamit ni Marcos ang iyang gahum sa pagsuspenso sa excise taxes sa LPG ug kerosene human sa rekomendasyon sa DBCC. Gibalik ang mga buhis niadtong Hulyo human mikunhod ang presyo sa krudo ubos sa threshold nga gitakda sa balaod. -Ato ni Bai