Pagbangon sa Nepal Human sa Baha Posibleng Mogasto og $5 Billion

Posibleng magkinahanglan ang Nepal og $4 billion hangtod $5 billion aron makabangon human sa grabeng pagbaha karong semanaha, matod ni Finance Minister Swarnim Wagle sa Reuters niadtong Sabado, kantidad nga katumbas sa hapit ikanapulo nga bahin sa ekonomiya sa nasod.

“The initial estimate is between $4-$5 billion. Just an estimate,” matod ni Wagle. “We will require much less than what we needed for the 2015 earthquake. Loss and damage is being assessed.”

Nahugno ang usa ka glacier niadtong Miyerkules, nga maoy hinungdan sa kusog kaayong pag-agos sa mga bato, yelo, lapok, ug debris agi sa mga suba sa kabukiran sa Himalayas, nga nakapatay sa kapin sa 600 ka tawo sa Nepal ug Tibet sa China, samtang kapin sa 2,000 ang wala pa makit-i.

Gipatag sa baha ang mga lungsod duol sa utlanan, gianod ang mga tulay ug dalan, ug nadaot ang dagkong hydropower stations.

Wala ipatin-aw ni Wagle nganong gilaum nga mas ubos ang gasto sa pagtukod pag-usab kumpara sa $9 billion nga gigasto human sa magnitude-7.8 nga linog niadtong 2015, ang pinakagrabeng katalagman nga natala sa Nepal. Hapit 9,000 ka tawo ang namatay, kapin sa tunga sa milyon ka balay ang naguba, ug ang kadaot gibanabana nga katumbas sa mga ikatulo nga bahin sa ekonomiya sa Nepal.

Bisan pa niini, dakong igo sa ekonomiya ang pagbaha niadtong Miyerkules tungod kay nagsalig ang Nepal sa remittances, turismo, ug hydropower. Nadaot usab ang mga power project nga naglangkob sa kapin sa 12% sa kinatibuk-ang kapasidad sa nasod sa pagprodyus og kuryente. -Ato ni Bai