OPEC+, planong dili usbon ang polisiya sa produksyon sa krudo

Gilaum nga dili usbon sa OPEC+ ang polisiya niini sa produksyon sa krudo alang sa Oktubre atol sa panagtagbo sa Domingo, matod sa duha ka tawo nga adunay kahibalo sa mga panaghisgot ngadto sa Reuters, samtang kinahanglan pang magkasabot ang grupo sa bag-ong mga quota sa dili pa magdesisyon sa sunod nga lakang niini sa produksyon.

Nahitabo ang panagtagbo samtang padayong nakabalda ang gubat sa Iran sa pag-eksport sa krudo agi sa Strait of Hormuz, nga nakapamenos sa impluwensya sa OPEC+ sa presyo ug bahin niini sa merkado. Dili sama kaniadto, limitado lamang ang epekto sa mga desisyon sa grupo bahin sa suplay sa krudo sa merkado.

Niadtong Agosto, nagkasabot ang OPEC+ sa pagdugang sa produksyon sa krudo alang sa Setyembre, nga nagtapos sa hinay-hinay nga pagtangtang sa pagkunhod sa produksyon nga 1.65 milyon ka baril matag adlaw nga unang gikasabotan niadtong 2023. Bisan pa sa gikasabotang pagdugang sa produksyon, ang grupo nga gilangkuban sa Organization of the Petroleum Exporting Countries ug mga kaalyado niini, lakip ang Russia, nagprodyus gihapon og mas ubos kay sa gitakdang target tungod sa gubat.

Aduna pay laing pagkunhod sa produksyon sa krudo nga gipatuman ang OPEC+, nga naglakip sa kadaghanan sa mga miyembro sa 21 ka nasud nga grupo hangtod sa katapusan sa 2026. Sa dili pa magdesisyon ang grupo kon unsaon hinay-hinay nga pagtangtang sa maong pagkunhod ug pagbalik sa produksyon sa krudo ngadto sa merkado, kinahanglan una kining motan-aw pag-usab sa kapasidad sa produksyon sa krudo sa matag miyembro aron matakda ang basihanan sa produksyon alang sa 2027, nga maoy gamiton sa pagtino sa ilang mga quota.

Posibleng mahitabo ang maong panaghisgot sa ulahing bahin sa 2026, busa gilaum nga temporaryong hunongon sa OPEC+ ang pagdugang sa produksyon sa krudo alang sa ika-upat nga quarter sa tuig, matod sa mga tinubdan ngadto sa Reuters kaniadto. -Ato ni Bai