Mga risgo sa AI, posibleng molabaw sa mga benepisyo kon walay panalipod — IMF chief

Gipasidan-an ni International Monetary Fund (IMF) chief Kristalina Georgieva niadtong Biyernes nga posibleng molabaw ang mga risgo sa artificial intelligence (AI) kaysa sa mga oportunidad nga mahatag niini kon walay igong mga lakang sa panalipod ug etikal nga mga lagda. Gisuportahan usab niya ang kombinasyon sa kaugalingong pag-regulate sa industriya ug pag-apil sa mga importanteng gobyerno.

Nahimong usa sa mga nag-unang hisgotanan ang bag-ong teknolohiya atol sa tinuig nga mga miting sa IMF ug World Bank karong semanaha sa Bangkok. Niadtong Martes, gipasidan-an sa IMF ang dagkong risgo sa pagtubo sa ekonomiya ug kalig-on sa pinansiya tungod sa posibleng pagtapos sa kusog nga pagpamuhunan sa AI, taas nga lebel sa utang, ug nagdugay nga gubat sa Middle East.

Atol sa usa ka panel discussion nga giapilan usab ni Anthropic co-founder Jack Clark, miingon si Georgieva nga nakatabang na ang AI sa pagpalig-on sa ekonomiya sa kalibotan. Apan mahimo usab kini nga hinungdan sa negatibong epekto sa ekonomiya kon dili dayon makab-ot ang dagkong pag-uswag sa produktibidad nga gilaoman gikan niini.

"If there are no safeguards, then the risks may exceed the opportunities. And above all, we do need an ethical foundation, and I'm not sure we are there as a society," matod niya.

Matod ni Georgieva, kinahanglan matuman ang pipila ka importanteng kondisyon aron makabenepisyo ang mga tawo sa tanang dapit sa bag-o ug paspas nga nag-uswag nga teknolohiya, lakip ang akses sa digital infrastructure, suplay sa kuryente, ug igong regulasyon.

Miingon siya nga ang mas dakong pangutana karon mao kon unsaon paghimo og mga lagda ug panalipod alang sa teknolohiya nga hilabihan ka paspas ang pag-uswag. Gikompara niya ang AI sa mga Formula One race car nga kusog nga nagdagan nga walay mga babag aron mapanalipdan ang mga tumatan-aw.

MGA MAKATARUNGANONG SUKDANAN

Angayan ang kaugalingong pag-regulate sa industriya tungod kay dili kaayo andam ang mga gobyerno sa pag-regulate o pagmonitor sa sektor nga kanunay nag-usab-usab. Apan kinahanglan usab nga apilon ang katilingban sa maong proseso. Matod ni Georgieva sa panel, kinahanglan maapil ang mga nasod nga adunay pinakadakong sektor sa AI, lakip ang US, China, ug India, ingon man ang mga nasod nga kabahin sa AI supply chain.

Miingon usab si Georgieva nga kinahanglan maapil ang mga institusyon sama sa IMF sa mga bahin nga sakop sa ilang kahanas, sama sa pagtubo sa produktibidad, labor markets, ug mga risgo sa kalig-on sa pinansiya.

"I think it's Formula One at night, without maybe brakes in the cars," matod ni Clark sa Anthropic, nga midugang sa pagtandi ni Georgieva. Matod niya, posible ang paghimo og mga sukdanan ug nagsugod na kini pinaagi sa unang mga policy framework sa European Union ug boluntaryong mga pasalig sa US.

Miingon si Clark nga kanunay nga gisulayan sa iyang kompanya ang mga sistema niini, gipublikar ang mga detalye sa mga pagsulay, ug gipaambit ang impormasyon. Apan dili siya mouyon nga ang maong mga lakang magpabilin lamang nga boluntaryo.

Sa dihang gipangutana kon pabor ba siya nga ang mga nasod nga naghimo og AI maoy magpatuman sa regulasyon, mitubag si Clark: "Yes. We need common sense standards, and that's how you ultimately give confidence in the technology and build the economy."

Gidugang niya nga gitugotan sa Anthropic ang mga independenteng evaluator gikan sa gawas sa kompanya nga mosusi sa ilang negosyo ug makatan-aw sa mga datos.

"That's ultimately what we think many others need to do," matod niya, samtang giabiabi ang pahayag ni Elon Musk nga posibleng buhaton usab kini sa iyang kompanyang SpaceX.

ARTIFICIAL O SUPER?

Miingon si US Treasury Undersecretary Erin Browne atol sa laing news conference nga sobra nga nagpunting ang IMF sa mga risgo nga giatubang sa ekonomiya sa kalibotan. Matod niya, kinahanglan mas hatagan og pagtagad ang mga oportunidad nga mahimong magdala og positibong kausaban sa ekonomiya, sama sa AI, nga gitawag na karon sa gobyerno sa US nga "super intelligence."

Niadtong Huwebes, gisultihan ni Browne ang Reuters nga nakighisgot ang Washington sa ubang mga shareholder sa IMF bahin sa paggamit sa bag-ong termino sa hiniusang pahayag nga giandam sa steering committee sa IMF.

Gisultihan ni Bank of England Governor Andrew Bailey ang usa ka miting sa Institute of International Finance nga mas positibo na ang iyang panglantaw karon kumpara sa miaging bulan nga magkasinabot ang mga nasod bahin sa mga sukdanan sa pagsulay sa AI.

"I'm not sure whether we're supposed to talk about AI now, are we? I did use the phrase the other day 'the artist formerly known as AI'," matod niya.

Mipahayag usab si Federal Reserve Chair Kevin Warsh atol sa laing panel, diin iyang giingnan si Georgieva: "Kristalina, you pronounce it AI. In the US we now pronounce it SI."

-Ato ni Bai